(តូក្យូ)៖ នាយករដ្ឋមន្រ្តីជប៉ុន លោក ស៊ីនហ្សូ អាបេ កាលពីឆ្នាំមុន បានស្នើឈ្មោះប្រធានាធិបតីអាមេរិក លោក ដូណាល់ ត្រាំ សម្រាប់​ការ​ប្រជែងយកពាន​ណូបែលសន្តិភាព ប៉ុន្តែការស្នើឈ្មោះនេះធ្វើឡើងតាមការទាមទាររបស់រដ្ឋាភិបាលទីក្រុងវ៉ាស៊ីនតោន។ នេះបើតាមការដក​ស្រង់ការផ្សាយចេញពីសារព័ត៌មានជប៉ុន Asahi នៅរសៀលថ្ងៃអាទិត្យ ទី១៧ ខែកុម្ភៈ ឆ្នាំ២០១៩។

សេចក្តីរាយការណ៍របស់សារព័ត៌មានជប៉ុនកើតមានឡើង បន្ទាប់ពីលោក ត្រាំ បានអះអាងកាលពីថ្ងៃសុក្រថា លោក អាបេ បានស្នើឈ្មោះ​របស់លោក ដើម្បីប្រជែងយកពានណូបែលសន្តិភាព សម្រាប់កិច្ចខិតខំបើកកិច្ចចរចាជាមួយ លោក គីម ជុងអ៊ុន និងការបន្ធូរបន្ថយ​​ភាព​តាន​​តឹង​ជាមួយកូរ៉េខាងជើង។

ឆ្លើយតបនឹងសំណួរពាក់ព័ន្ធពីក្តីរំពឹងរបស់លោក ចំពោះ​កិច្ចប្រជុំកំពូលលើកទីពីរ​ជាមួយ លោក គីម នៅចុងខែកុម្ភៈនេះ ក្នុង​អំឡុង​សន្និសីទ​សារ​ព័ត៌​មានមួយនៅឯសេតវិមានលោក ដូណាល់ ត្រាំ បានប្រាប់ថា លោក អាបេ បានប្រគល់សន្លឹកថតចម្លង​​នៃលិខិតដ៏មានអត្ថន័យ​ចំនួន​​៥ទំព័រ​ ដែលលោកបានសរសេរផ្ញើទៅកាន់គណៈកម្មការណូបែល។ លោក ត្រាំ បានបញ្ជាក់ថា ក្នុងនោះ លោក អាបេ បាន​ស្នើ​ឈ្មោះ​របស់​លោក ជា​បេក្ខជនសម្រាប់ពានណូបែលសន្តិភាព។

គួរជម្រាបថា បើតាមសារព័ត៌មាន Asahi រដ្ឋាភិបាលអាមេរិកបានទាមទារ​ឲ្យ​លោក អាបេ ស្នើឈ្មោះ លោក ត្រាំ សម្រាប់ពានណូបែល​សន្តិភាព នៅក្រោយកិច្ចប្រជុំកំពូលរ​របស់លោក ត្រាំ កាលពីខែមិថុនា ឆ្នាំ២០១៨ ជាមួយ​កូរ៉េខាងជើង លោក គីម ជុងអ៊ុន ​នៅ​សិង្ហបុរី ដែលជាជំនួបលើកដំបូងបំផុតក្នុងប្រវត្តិសាស្រ្តរវាង​ប្រមុខដឹកនាំកូរ៉េខាងជើង និងប្រធានាធិបតីអាមេរិកដែលកំពុងកាន់អំណាច។

ចំណែកឯរដ្ឋាភិបាលជប៉ុនវិញ ពុំបានធ្វើការបកស្រាយបញ្ជាក់ជុំវិញការអះអាងរបស់លោក ត្រាំ ឡើយ ខណៈពានណូបែលឆ្នាំ២០១៨ បាន​ទៅលើលោក Denis Mukwege និងអ្នកនាង Nadia Murad ដែលជាអ្នកប្រយុទ្ធប្រឆាំងនឹងអំពើហិង្សាផ្លូវភេទក្នុងភ្លើងសង្រ្គាម៕