(ពិភពលោក)៖ នៅថ្ងៃសៅរ៍ ទី១៦ ខែកុម្ភៈ ឆ្នាំ២០១៩នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ មន្ទីរការពារជាតិអាមេរិកបញ្ចកោណ បានបញ្ចេញនូវយន្តហោះចម្បាំង និងទម្លាក់គ្រាប់បែកដ៏មានអានុភាពបំផុតជាច្រើន នៅក្នុងសមយុទ្ធដ៏ធំស្ថិតក្នុងគោលដៅបង្កើតសមត្ថភាពកម្ចាត់សត្រូវ ខណៈអ្នកតាមដានមួយចំនួនមើលឃើញថា វាហាក់ជាការត្រៀមធ្វើសង្គ្រាមនៅថ្ងៃណាមួយ៕
២៖ ប៉ូលិសអាមេរិកបានឱ្យដឹងថាមនុស្ស៥នាក់ បានបាត់បង់ជីវិត និងជាច្រើននាក់ផ្សេងទៀតរងរបួស បន្ទាប់ពីខ្មាន់កាំភ្លើងម្នាក់បើកការបាញ់ប្រហារនៅឯសួនឧស្សាហកម្មមួយកន្លែងក្នុងរដ្ឋ Illinois៕
៣៖ រាជទាយាទនៃព្រះរាជាណាចក្រអារ៉ាប៊ីសាអូឌីត គឺព្រះអង្គម្ចាស់ ម៉ូហាំម៉េដ ប៊ីនសាល់ម៉ាន់ (Mohammed bin Salman) បានសម្រេចពន្យារពេលការបំពេញទស្សនកិច្ចមកកាន់ប្រទេសម៉ាឡេស៊ីយ៉ាងបន្ទាន់បំផុត ប៉ុន្តែមិនបានបញ្ជាក់អំពីមូលហេតុនោះឡើយ ខណៈរឿងក្តីធ្វើឃាតអ្នកសារព័ត៌មាន Washington Post កាលពីឆ្នាំមុន នៅតែមិនទាន់រកយុត្តិធម៌ឃើញនៅឡើយ៕
៤៖ អណ្តូងរ៉េពីរកន្លែងក្បែរៗគ្នាត្រូវបានទឹកជន់លិច ខណៈអាជ្ញាធរហ្ស៊ីមបាវ៉េបានអះអាងថា កម្មករដែលនៅក្នុងអណ្តូងទាំងនោះជាង ៦០នាក់ ទំនងជាមិនអាចនៅមានជីវិតរស់នោះឡើយ៕
៥៖ ប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ បានបញ្ជាឱ្យកងទ័ពត្រៀមខ្លួនអនុវត្តផែនការឈរជើងជាអចិន្ត្រៃយ៍នៅឯតំបន់ព្រំដែនជាប់ប្រទេសកូឡុំប៊ី ដើម្បីទប់ស្កាត់រាល់ការប៉ុនប៉ងឈ្លានពានដោយយោធាដែលលោកចោទថា សហរដ្ឋអាមេរិកជាមេគំនិត៕
៦៖ រដ្ឋកាលីហ្វ័រញ៉ាស្ថិតនៅភាគខាងលិចសហរដ្ឋអាមេរិក មានគម្រោងដាក់ពាក្យបណ្ដឹង ប្រឆាំងរដ្ឋបាលប្រធានាធិបតីលោក ដូណាល់ ត្រាំ ជុំវិញការប្រកាសដាក់ប្រទេសក្នុងភាពអាសន្ន ដើម្បីសាងសង់ជញ្ជាំងព្រំដែនភាគខាងត្បូង ជាមួយប្រទេសម៉ិចស៊ីកូ៕
