(ពិភពលោក)៖ នៅថ្ងៃសុក្រ ទី១៥ ខែកុម្ភៈ ឆ្នាំ២០១៩នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ ក្រុមអ្នកវិទ្យាសាស្រ្តចិនបានប្រកាសដាក់ឈ្មោះ ទីតាំងចុះចតរបស់យាន ឆាងអឺ ៤ (Chang'e-4) ព្រមទាំងតំបន់ភូមិសាស្រ្តមួយចំនួនទៀតនៅលើផ្ទៃព្រះច័ន្ទ មួយចំហៀងទៀតដែលខ្លួនខំធ្វើការសិក្សាស្រាវជ្រាវ៕
២៖ រដ្ឋាភិបាលវៀតណាមបានសម្រេច ផ្តល់ការអនុគ្រោះបន្ថែមដល់បណ្តាក្រុមហ៊ុនអាជីវកម្ម ដែលធ្វើប្រតិបត្តិការក្នុងវិស័យវិទ្យសាស្រ្ត និងបច្ចេកវិទ្យា ដោយរួមមានការកាត់បន្ថយពន្ធសាជីវកម្ម និងការលើកលែងពន្ធ, ការបន្ទាបថ្លៃជួលដីធ្លី និងផ្ទៃទឹក, រួមទាំងការលើកទឹកចិត្តផ្នែកកម្ចីឥណនាជាដើម៕
៣៖ មនុស្សយ៉ាងហោចណាស់៤៦នាក់ ត្រូវបានសម្លាប់នៅក្នុងការវាយប្រហារបំផ្ទុះគ្រាប់បែកដ៏ប្រល័យមួយរបស់ក្រុមសកម្មយុទ្ធលើក្បួនរថយន្ដដឹកកងកម្លាំងសន្តិសុខឥណ្ឌានៅឯតំបន់កាស្មៀរ៕
៤៖ រដ្ឋមន្ត្រីបារាំងទទួលបន្ទុកកិច្ចការអឺរ៉ុប លោកស្រី ណាថាលី ឡយហ្សូ (Nathalie Loiseau) បានឱ្យដឹងថា អគ្គរដ្ឋទូតបារាំងប្រចាំប្រទេសអ៊ីតាលី ដែលត្រូវបានកោះហៅមកកាន់ទីក្រុងប៉ារីស កាលពីដើមខែកុម្ភៈកន្លងទៅនោះ ត្រូវបានបង្គប់ឲ្យធ្វើដំណើរត្រឡប់ទៅទីក្រុងរ៉ូមវិញ នៅថ្ងៃសុក្រសប្តាហ៍នេះ៕
៥៖ នាយករដ្ឋមន្រ្តីអេស៉្បាញ លោក Pedro Sanchez នាថ្ងៃសុក្រនេះបានប្រកាសថា ការបោះឆ្នោតសកលនឹងត្រូវធ្វើឡើងមុនអាណត្តិ ក្នុងខែមេសា ខាងមុខ ដែលពីដំបូងឡើយត្រូវប្រព្រឹត្តទៅនាឆ្នាំក្រោយ។
៦៖ ក្រុមហ៊ុន E-Commerce ធំបំផុតរបស់សហរដ្ឋអាមេរិក Amazon នាថ្ងៃព្រហស្បតិ៍សប្តាហ៍នេះបានប្រកាសបោះបង់ចោលគម្រោងសាងសង់ទីស្នាក់ការថ្មី នៅឯទីក្រុងញូយ៉ក ដោយសារតែការប្រឆាំងពីអ្នកនយោបាយមួយចំនួន នៅក្នុងទីក្រុងក៏ដូចជានៅក្នុងរដ្ឋញូយ៉ក ខណៈអ្នកញូយ៉កភាគច្រើនគាំទ្រផែនការនេះ៕
