(ការ៉ាកាស់)៖ ឧទ្ធម្ភាគចក្រយោធាមួយគ្រឿង របស់កងទ័ពអាកាសវេណេស៊ុយអេឡា បានធ្លាក់នៅរដ្ឋ ខូចេដែស (Cojedes) ភាគខាងលិចប្រទេស នៅក្នុងការធ្វើសមយុទ្ធយោធាដែនអាកាសមួយ ក្នុងន័យត្រៀមទប់ទល់ការឈ្លានពីសំណាក់សហរដ្ឋអាមេរិក និងសម្ព័ន្ធមិត្តអាមេរិក។ នេះបើតាមការចេញផ្សាយដោយ Sputnik នាល្ងាចថ្ងៃព្រហស្បតិ៍ ទី០៧ ខែកុម្ភៈ ឆ្នាំ២០១៩។
គួរបញ្ជាក់ថា នៅក្នុងករណីធ្លាក់ឧទ្ធម្ភាគចក្រខាងលើនេះ គឺពុំបានបណ្តាលឲ្យនរណាម្នាក់បាត់បង់ជីវិតឡើយ ប៉ុន្តែយោធា០៥បានរងរបួសធ្ងន់ និងកំពុងសម្រាកព្យាបាល។ ឧទ្ធម្ភាគចក្រដែលធ្លាក់នោះ គឺជាប្រភេទ MI 35 ដែលជាផលិតផលរបស់រុស្ស៊ី ប៉ុន្តែក្រោយការធ្លាក់ភ្លាមៗកាលពីថ្ងៃទី០៥ ខែកុម្ភៈនោះ ព័ត៌មានពុំត្រូវបានចេញផ្សាយជាសាធារណៈនោះឡើយ៕
