(អឺរ៉ុប)៖ ទីបំផុតចក្រភពអង់គ្លេស អេស៉្បាញ បារាំង និងស៊ុយអែត នាថ្ងៃចន្ទនេះបានសម្រេចទទួលស្គាល់មេបក្សប្រឆាំងវេណេស៊ុយអេឡា លោក Juan Guaido ជាប្រធានាធិបតីស្តីទីស្របច្បាប់នៃប្រទេសអាមេរិកឡាទីនមួយនេះ។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានបារាំង AFP នៅរសៀលថ្ងៃចន្ទ ទី០៤ ខែកុម្ភៈ ឆ្នាំ២០១៩។
ការប្រកាសទទួលស្គាល់ខាងលើរបស់ប្រទេសអឺរ៉ុបទាំង៤ធ្វើឡើង បន្ទាប់ពីប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ មិនព្រមធ្វើតាមឱសានវាទកាលពីថ្ងៃទី២៦ ខែមករា របស់អឺរ៉ុប ដែលបានកំណត់ពេល០៨ថ្ងៃ ឲ្យលោក ម៉ាឌូរ៉ូ រៀបចំការបោះឆ្នោតជ្រើសរើសប្រធានាធិបតីឡើងវិញសាជាថ្មី។ មិនតែប៉ុណ្ណោះ ប្រទេសអឺរ៉ុបទាំង០៤ ក៏បានជំរុញឲ្យ លោក Guaido រៀបចំការបោះឆ្នោតមួយដែលសេរីនិងតម្លាភាពឲ្យបានឆាប់ៗផងដែរ។
គួរជម្រាបថា ក្រោយលោក Juan Guaido ប្រកាសតែងតាំងខ្លួនជាប្រធានាធិបតីស្តីទីនៃប្រទេសវេណេស៊ុយអេឡា អាមេរិកនិងសម្ព័ន្ធមិត្តមួយចំនួនរបស់ទីក្រុងវ៉ាស៊ីនតោននៅអាមេរិកឡាទីន បានចេញមុខទទួលស្គាល់ លោក Guaido ភ្លាមៗ ខណៈលោក ម៉ាឌូរ៉ូ នៅរក្សាបានការគាំទ្រពីរុស្ស៊ី ចិន តួកគី និងយោធាវេណេស៊ុយអេឡាផ្ទាល់៕
