(ម៉ូស្គូ)៖ ប្រទេសរុស្ស៊ីកាលពីសប្តាហ៍មុននេះ ទើបតែចាប់បានសញ្ញាយន្តហោះបរទេសសរុបចំនួន ២៣គ្រឿង ដែលបានចូលមកស៊ើបការណ៍សម្រាប់នៅតាមបណ្តោយព្រំដែនភាគខាងលិច ដែលចំនួននេះកើនឡើងលើសពីសប្តាហ៍មុនៗទៅទៀត។ នេះបើតាមការចេញផ្សាយដោយសារព័ត៌មាន Sputnik នាព្រឹកថ្ងៃសុក្រ ទី០១ ខែកុម្ភៈ ឆ្នាំ២០១៩។
បើតាមការបញ្ជាក់បន្ថែមទៀតពីសារព័ត៌មានខាងលើ រុស្ស៊ីបានក៏បានបញ្ចេញយន្តហោះចម្បាំងរបស់ខ្លួនចំនួន ០៤លើកផងដែរ ដើម្បីស្ទាក់យន្តហោះបរទេសទាំងនោះ ប៉ុន្តែយន្តហោះទាំងនោះពុំបានឆ្លងព្រំដែន ចូលមកក្នុងដែនអាកាសរុស្ស៊ីនោះឡើយ។ ការចាប់សញ្ញាយន្តហោះបរទេសចូលមកស៊ើបការណ៍សម្ងាត់នេះ គឺត្រូវបានធ្វើឡើងចាប់តាំងពីថ្ងៃ១៨ ខែមករា មកម្ល៉េះ។
គួរបញ្ជាក់ថា កាលពីសប្តាហ៍មុននេះក្រុមការងារគ្រប់គ្រងដែនអាកាសរុស្ស៊ី បានចាប់បានសញ្ញាយន្តហោះ Gulfstream របស់ប្រទេសស៊ុយអ៊ែត ហោះហើរនៅលើដែនសមុទ្របាល់ទិក (Baltic Sea) ដែលស្ថិតនៅកៀកព្រំដែនរុស្ស៊ីមែនទែន ប៉ុន្តែពុំមានការបំពានបានកើតឡើងនោះឡើយ៕
