(វ៉ាស៊ីនតោន)៖ ប្រធានាធិបតីអាមេរិកលោក ដូណាល់ ត្រាំ បានរិះគន់ទីភ្នាក់ងារស៊ើបការណ៍សំងាត់របស់លោកយ៉ាងខ្លាំង ជាមួយការប្រើប្រាស់សម្ដីឌឺដងឱ្យមេចារកម្មអាមេរិកទាំងអស់ ត្រឡប់ទៅរៀនសាជាថ្មី បន្ទាប់ពីចេញរបាយការណ៍មួយ ដែលផ្ទុយទៅនឹងការអះអាងរបស់លោក។ នេះបើតាមការចេញផ្សាយដោយសារព័ត៌មាន CNN នៅល្ងាចថ្ងៃព្រហស្បតិ៍ ទី៣១ ខែមករា ឆ្នាំ២០១៩។
ថ្លែងនៅលើ Twitter នៅថ្ងៃពុធសប្ដាហនេះ លោក ដូណាល់ ត្រាំ បានលើកឡើងយ៉ាងដូច្នេះថា «ពេលខ្ញុំឡើងកាន់តំណែងជា ប្រធានាធិបតីអាមេរិក អ៊ីរ៉ង់បានបង្កភាបចលាចលនៅទូទាំងតំបន់មជ្ឈិមបូព៌ា...ប៉ុន្តែក្រោយរំសាយកិច្ចព្រមព្រៀងនុយក្លេអ៊ែរអ៊ីរ៉ង់ដ៏អាក្រក់រួចមក អ្វីៗកំពុងល្អប្រសើរឡើង។ ដូច្នេះគួរតែប្រយ័ត្នចំពោះអ៊ីរ៉ង់ ហើយនាយកទីភ្នាក់ងារស៊ើបការណ៍សំងាត់ទាំងអស់ គួរតែត្រឡប់ទៅរៀនឡើងវិញ»។
គួរបញ្ជាក់ថា ប្រតិកម្មរបស់លោក ដូណាល់ ត្រាំ ធ្វើឡើងបន្ទាប់ពីក្រុមនាយកចារកម្មអាមេរិក កាលពីថ្ងៃអង្គារបានប្រាប់ព្រឹទ្ធសភាថា ពួកគេមិនជឿឡើយថាបច្ចុប្បន្ន អ៊ីរ៉ង់កំពុងផលិតអាវុធនុយក្លេអ៊ែរ ហើយដែលគឺផ្ទុយទាំងស្រុងទៅនឹងការអះអាងរបស់លោក ត្រាំ រួមរដ្ឋបាលរបស់លោកថា អ៊ីរ៉ង់គឺជាការគំរាមកំហែងនុយក្លេអ៊ែរ៕
