ទស្សនាផែនទីពិសេសមួយ បង្ហាញពីក្រុមប្រទេសដើរតាមអាមេរិក និងក្រុមប្រទេសគាំទ្ររដ្ឋាភិបាលលោក ម៉ាឌូរ៉ូ (Photo inside) (Video Inside)
30-01-2019 15:59
(វ៉ាស៊ីនតោន)៖ វេណេស៊ុយអេឡាបច្ចុប្បន្ន កំពុងប្រឈមមុខនឹងវិបត្តិមានប្រធានាធិបតីដល់ទៅពីររូបគឺមេបក្សប្រឆាំងលោក ជូអាន ហ្គៃដូ (Juan Guaido) ដែលសហរដ្ឋអាមេរិកគាំទ្រ និងលោក នីកូឡាស់ ម៉ាឌូរ៉ូ ដែលជាប់ឆ្នោត និងទើបស្បថឡើងកាន់តំណែងជាផ្លូវការ ខណៈកំពុងមានការព្រួយបារម្ភថា វិបត្តិនេះនឹងបង្កឱ្យពិភពលោកបែកបាក់គ្នា ដោយសារតែប្រទេសខ្លះគាំទ្រមេបក្សប្រឆាំង និងខ្លះទៀតគាំទ្រលោក ម៉ាឌូរ៉ូ។
លោក នីកូឡាស់ ម៉ាឌូរ៉ូ បានស្បថឡើងកាន់តំណែងជាប្រធានាធិបតីសម្រាប់អាណត្តិទី ២ កាលពីថ្ងៃទី១០ ខែមករា ឆ្នាំ២០១៩។ ប៉ុន្តែភ្លាមនោះដែរលោក Guaido ដែលជាប្រធានសភារបស់គណបក្សប្រឆាំង បានប្រកាសតែងតាំងខ្លួនឯងជាប្រធានាធិបតីស្ដីទីជាមួយការសន្យាថា នឹងស្វែងរកលិទ្ធិប្រជាធិបតេយ្យពិតប្រាកដ និងសេរីភាពដល់ប្រជាជនវេណេស៊ុយអេឡា។
ខាងក្រោមនេះ គឺផែនទី និងឈ្មោះនៃបណ្ដាប្រទេសដែលគាំទ្រអ្នកទាំងពីរ ខណៈប្រទេសធំៗនានាកំពុងដើរកៀរគរ ប្រទេសជាមិត្តខ្លួនផ្សេងបន្ថែមទៀតទៀត ឲ្យដើរតាមរបត់នយោបាយរៀងៗខ្លួន៖
១៖ បណ្ដាប្រទេសគាំទ្រលោក ម៉ាឌូរ៉ូ មានដូចជា៖ រុស្ស៊ី ចិន តួកគី អ៊ីរ៉ង់ ស៊ីរី គុយបា បូលីវី និងកូរ៉េខាងជើង ស្របពេលម៉ិចស៊ីកូ និងអ៊ុយរ៉ាហ្កាយអំពាវនាវឱ្យមានកិច្ចសន្ទនា៕
២៖ បណ្តាប្រទេសគាំទ្រលោក Guaido មានដូចជា៖ សហរដ្ឋអាមេរិក កាណាដា អង់គ្លេស ហ្គាតេម៉ាឡា ហុងដូរ៉ាស់ កូស្ដារីកា ប៉ាណាម៉ា អេក្វាឌ័រ កូឡុំប៊ី ប៉េរូ ឈីលី អាហ្សង់ទីន ប៉ារ៉ាហ្កាយ ប្រេស៊ីល អូស្ត្រាលី កូសូវ៉ូ និងអាល់បានី។
ចំណែកឯ បណ្ដាប្រទេសអឺរ៉ុបដូចជាបារាំង អេស្ប៉ាញ អាល្លឺម៉ង់ ព័រទុយហ្គាល់ និង ហូឡង់បានទុកពេល ០៨ថ្ងៃឱ្យលោក ម៉ាឌូរ៉ូ រៀបចំការបោះឆ្នោតឡើងវិញ បើពុំដូច្នោះទេពួកគេនឹងទទួលស្គាល់លោក Guaido ជាប្រធានាធិបតីស្របច្បាប់របស់វេណេស៊ុយអេឡា។
ទោះបីជាបែបនេះក្តី ទាំងសងខាងហាក់មិនបានបង្ហាញជំហរថា នឹងចុះចាញ់នោះឡើយ ដោយមេបក្សប្រឆាំងលោក Guaido កំពុងត្រៀមរៀបចំធ្វើបាតុកម្មនៅថ្ងៃពុធសប្តាហ៍ ចំពោះមុខបម្រាមធ្វើដំណើរចេញទៅក្រៅប្រទេស និងការបង្កកគណនីធនាគារពីសំណាក់តុលាការកំពូលវេណេស៊ុយអេឡា។
ដោយឡែកលោក ម៉ាឌូរ៉ូ វិញបានផ្តល់បទសម្ភាសន៍មួយនៅថ្ងៃអង្គារសប្តាហ៍នេះ ដោយធ្វើការវាយប្រហារពាក្យសម្តីខ្លាំងៗដល់អាមេរិក និងសម្ព័ន្ធមិត្ត ហើយលោកបានយល់ព្រមអង្គុយចរចាជាមួយមេបក្សប្រឆាំងផងដែរ ដោយមានអន្តរជាតិជាអាជ្ញាកណ្តាល ប៉ុន្តែរឿងបោះឆ្នោតឡើងវិញនោះ គឺប្រធានាធិបតីរូបនេះមិនព្រមនោះឡើយ៕
ប្រភព៖ Bloomberg (ថ្ងៃពុធ ទី៣០ ខែមករា ឆ្នាំ២០១៩)
