(ញូដេលី)៖ អាជ្ញាធរឥណ្ឌាបានចាប់ផ្តើមដឹកជញ្ជូនសត្វក្រពើប្រមាណ ៣០០ក្បាល ចេញពីបឹងមួយកន្លែងក្បែររូបសំណាកខ្ពស់បំផុតនៅលើពិភពលោក ដើម្បីបើកផ្លូវដល់ការបម្រើសេវាធ្វើដំណើរតាមយន្តហោះចុះលើទឹកសម្រាប់ភ្ញៀវទេសចរ ដែលមានបំណងចង់ទៅទស្សនានៅទីនោះ។ នេះបើតាមការដកស្រង់ការផ្សាយចេញពីសារព័ត៌មាន BBC នៅព្រឹកថ្ងៃសៅរ៍ ទី២៦ ខែមករា ឆ្នាំ២០១៩។
រូបសំណាករបស់វីរៈបុរសដណ្តើមឯករាជ្យជាតិជូនឥណ្ឌា លោក សាដា ផាធែឡ (Sardar Vallabhbhai Patel) ដែលមានកម្ពស់ដល់ទៅ ១៨២ម៉ែត្រ ត្រូវបានបើកសម្ពោធជាផ្លូវការកាលពីខែតុលា ឆ្នាំ២០១៨ ហើយវាបានក្លាយជាកន្លែងទាក់ទាញភ្ញៀវទេសចរ ដ៏មានប្រជាប្រិយភាពបំផុតមួយនៅក្នុងទីក្រុង អាមេដាបាដ (Ahmedabad) នៃរដ្ឋ ហ្គូហ្សារ៉ាត់ (Gujarat)។
សម្រាប់អ្វីដែលជាបញ្ហាកំពុងចោទនោះ គឺពុំមានសេវារថភ្លើងទៅកាន់ទីនោះឡើយ ខណៈអ្នកទេសចរភាគច្រើនទៅដល់រូបសំណាកដែលមានឈ្មោះថា «Statue of Unity (រូបសំណាងនៃការរួបរួមជាតិ)» នេះតាមរយៈរថយន្តក្រុងប៉ុណ្ណោះ ខណៈយន្តហោះចុះចតលើទឹក កំពុងត្រូវបានអាជ្ញាធរឥណ្ឌាគិតគូរ យកជាមធ្យោបាយធ្វើដំណើរថ្មីមួយទៀត។
គួរជម្រាបថា ដោយសារហេតុផលខាងលើនេះ សត្វក្រពើរាប់រយក្បាលដែលរស់នៅក្នុងបឹងក្បែររូបសំណាកខាងលើ កំពុងត្រូវគេដឹកជញ្ជូនយកចេញទៅកាន់កន្លែងផ្សេង ដើម្បីបើកផ្លូវសម្រាប់ការបង្កើតសេវាធ្វើដំណើរតាមយន្តហោះខ្នាតតូច ដែលអាចចុះចតនៅលើផ្ទៃទឹក។ ប៉ុន្តែក្រុមអ្នកអភិរក្សសត្វក៏បានធ្វើការរិះគន់ធ្ងន់ៗចំពោះគម្រោងនេះផងដែរ៕
