(សាន់ហ្វ្រាន់ស៊ីស្កូ)៖ កម្មវិធីកុំព្យូរទ័រសម្រាប់ការងាររដ្ឋបាល Microsoft Office 365 បានបង្ហាញខ្លួនជាលើកដំបូងនៅលើកម្មវីធី App Store នៃប្រភេទកុំព្យូទ័រ Mac របស់ក្រុមហ៊ុន Apple។ នេះបើតាមសេចក្តីប្រកាសរបស់ក្រុមហ៊ុន Apple ដកស្រង់ខ្លឹមសារដោយទីភ្នាក់ងារព័ត៌មានចិន ស៊ីនហួរ នៅរសៀលថ្ងៃសុក្រ ទី២៥ ខែមករា ឆ្នាំ២០១៩។
ក្រុមហ៊ុន Apple បានឲ្យដឹងនៅថ្ងៃព្រហស្បតិ៍សប្តាហ៍នេះថា អ្នកប្រើប្រាស់នាពេលនេះអាចទិញ Subscription សម្រាប់កម្មវិធី Office 365 ដែលរួមមាននូវកម្មវិធីសំខាន់ៗសម្រាប់ការងាររដ្ឋបាលដូចជា Word, PowerPoint, និង Excel ដែលមានការពេញនិយមនៅលើកុំព្យូទ័រដំណើរការដោយប្រព័ន្ធ Windows របស់ក្រុមហ៊ុន Microsoft តាមរយៈកម្មវិធី App Store របស់កុំព្យូទ័រ Mac បានហើយ។
គួរជម្រាបថា បើតាម Apple និង Microsoft កម្មវិធី Office 365 នៅលើ App Store ត្រូវបានរចនាឡើងជាពិសេស ដើម្បីផ្តល់បទពិសោធន៍ល្អប្រសើរបំផុតសម្រាប់អ្នកប្រើប្រាស់កុំព្យូទ័រ Mac។ ការមកដល់នៃ Office 365 នៅលើកម្មវិធី App Store ហាក់ដូចមានភាពយឺតយ៉ាវបន្តិច ព្រោះកាលពីឆ្នាំមុន Apple ធ្លាប់បានសន្យាថា Office 365 នឹងបង្ហាញវត្តមាននៅចុងឆ្នាំ២០១៨ តបតាមការទទូចរបស់អ្នកប្រើប្រាស់ Mac ជាច្រើន៕
