(អង់ការ៉ា)៖ ប្រទេសតួកគីកំពុងរៀបចំបើកការស៊ើបអង្កេតជាលក្ខណៈអន្តរជាតិ ជុំវិញករណីឃាតកម្មលើអ្នកកាសែតជនជាតិអារ៉ាប៊ីសាអូឌីត លោក Jamal Khashoggi ហើយនឹងចាត់វិធានការជាបន្តបន្ទាប់ទៀត ក្នុងប៉ុន្មានថ្ងៃខាងមុខ។ នេះបើតាមការប្រកាសរបស់រដ្ឋមន្រ្តីការបរទេសតួកគី លោក Mevlut Cavusoglu ដកស្រង់សម្តីដោយសារព័ត៌មានចិន CGTN នៅល្ងាចថ្ងៃអង្គារ ទី២២ ខែមករា ឆ្នាំ២០១៩។
លោក Khashoggi ដែលជាអ្នករិះគន់មិនសំចៃមាត់ម្នាក់លើព្រះរាជទាយាទអារ៉ាប៊ីសាអូឌីត គឺព្រះអង្គម្ចាស់ Mohammed bin Salman និងបានចាប់ផ្តើមបម្រើការងារឲ្យកាសែត Wahshington Post បន្ទាប់ពីផ្លាស់ទៅរស់នៅសហរដ្ឋអាមេរិកនោះ ត្រូវបានគេសម្លាប់នៅក្នុងស្ថានកុងស៊ុលនៃព្រះរាជាណាចក្រអារ៉ាប៊ីសាអូឌីត ប្រចាំនៅទីក្រុងអ៊ីស្តង់ប៊ុលប្រទេសតួកគី កាលពីថ្ងៃទី០២ ខែតុលា ឆ្នាំ២០១៨។
ប្រធានាធិបតីតួកគី លោក អឺដូហ្គាន់ ធ្លាប់បាននិយាយថា ការសម្លាប់អ្នកកាសែតរូបនេះ ត្រូវបានធ្វើឡើងក្រោមការបង្គាប់បញ្ជាពីបុគ្គលមានឋានៈដ៏ខ្ពង់ខ្ពស់នៃថ្នាក់ដឹកនាំរបស់អារ៉ាប៊ីសាអូឌីត។ ក៏ប៉ុន្តែទីក្រុងរីយ៉ាដបានច្រានចោល ការចោទប្រកាន់ដែលថាព្រះអង្គម្ចាស់ស្នងរាជ្យ bin Salman មានជាប់ពាក់ព័ន្ធក្នុងរឿងនេះ។
គួរជម្រាបថា ក្រុមព្រះរាជអាជ្ញាអារ៉ាប៊ីសាអូឌីត កំពុងតែព្យាយាមស្នើឲ្យមានការផ្តន្ទាទោសប្រហារជីវិតលើជនសង្ស័យ៥នាក់ក្នុងចំណោម១១នាក់ ដែលត្រូវបានឃុំខ្លួនជុំវិញករណីឃាតកម្មនេះ។ ដោយសារតែបញ្ហានេះ អារ៉ាប៊ីសាអូឌីត បានធ្លាក់ក្រោមសម្ពាធយ៉ាងតានតឹងពីអន្តរជាតិ ជាពិសេសគឺពីសំណាក់សហរដ្ឋអាមេរិក ដែលជាសម្ព័ន្ធដ៏ជិតស្និទ្ធរបស់ខ្លួន៕
