(សិង្ហបុរី)៖ រដ្ឋមន្រ្តីការពារជាតិសិង្ហបុរី លោក Ng Eng Hen នាថ្ងៃសុក្រនេះបាននិយាយថា ​យន្តហោះចម្បាំងជំនាន់ថ្មី​ F-35 របស់ក្រុមហ៊ុនអាមេរិក Lockheed Martin ជាបេក្ខភាពសាកសមជាងគេបំផុត ដើម្បីយកមកប្រើប្រាស់ជំនួស​​​​​យន្ត​ហោះ​ចម្បាំង​​​ធុន F-16 របស់ខ្លួន ហើយថានឹង​ទិញប៉ុន្មានគ្រឿង​ដំបូង​សម្រាប់ការវាយតម្លៃស្ទាបស្ទង់មើលជាមុនសិន។ នេះបើតាមការ​ដក​ស្រង់ការផ្សាយចេញពីសារព័ត៌មាន Channel News Asia នៅយប់ថ្ងៃសុក្រ ទី១៨ ខែមករា ឆ្នាំ២០១៩។

ជាមួយកញ្ចប់ថវិកាធំជាងគេសម្រាប់វិស័យការពារជាតិ ក្នុងចំណោមបណ្តា​ប្រទេសនៅអាស៊ីអាគ្នេយ៍ សិង្ហបុរីគឺប្រៀបដូចជា​​​ពានរង្វាន់ដ៏សំខាន់មួយសម្រាប់​ក្រុមហ៊ុនផលិតសព្វាវុធនៅទូទាំងពិភពលោក ខណៈប្រទេសមានស្តុកស្តម្ភមួយនេះ​កំពុងផ្តោត​ទៅលើ​ការវិនិយោគក្នុងបច្ចេកវិទ្យាយោធាថ្មីៗ និងការ​ធ្វើឲ្យប្រសើរ​ឡើង​នូវបរិក្ខាយោធា​របស់ខ្លួន។

សម្រាប់កងយន្តហោះចម្បាំង F-16 ប្រមាណជា៦០គ្រឿង​របស់សិង្ហបុរីនាពេលបច្ចុប្បន្ន ដែលបានដាក់ឲ្យ​ធ្វើប្រតិបត្តិការ​​ជា​លើក​ដំបូង​​កាលពី​ឆ្នាំ១៩៩៨ នឹងត្រូវចូលនិវត្តន៍ក្រោយឆ្នាំ២០៣០។ លោក Ng បានឲ្យដឹងថា ស្ថាប័នពាក់ព័ន្ធរបស់​សិង្ហបុរី​នឹង​ចាប់​ផ្តើម​​ធ្វើ​​ការទាក់ទង​​​ទៅភាគីអាមេរិក ប៉ុន្តែវាអាចចំណាយពេលពី​៩ទៅ១២ខែ ដើម្បីសម្រេចនូវការកំណត់លក្ខខណ្ឌ​​ផ្សេង​ៗ​នៅ​​​ក្នុង​​កិច្ច​ព្រមព្រៀង​។

គួរជម្រាបថា ក្នុងចំណោមចំណូលសរុបដែលក្រុមហ៊ុន Lockheed Martin រកបាន គឺមួយភាគបួនបានមកពីការលក់​យន្តហោះ​ចម្បាំង F-35។ យន្តហោះចម្បាំង F-35A ដែលមានការពេញនិយមជាទូទៅជាងគេ មានតម្លៃ​ប្រហែល៩០លានដុល្លារ​​អាមេរិក​​ក្នុង​មួយ​គ្រឿង​ ប៉ុន្តែសិង្ហបុរីត្រូវមតិភាគច្រើនជឿជាក់​ចាប់អារម្មណ៍លើ F-35B ជាង ដែលអាចហោះហើរចេញ​ពី​ផ្លូវ​មាន​ប្រវែង​ខ្លី និង​​ចុះ​ចត​​ត្រង់​ស្មើដូចឧទ្ធម្ភាគចក្របាន ប៉ុន្តែថ្លៃជាង F-35A៕