(បាកដាដ)៖ ស្តេចហ៊្សកដានី​​ Abdullah ទី២ នាថ្ងៃចន្ទនេះបានយាងមកបំពេញព្រះរាជទស្សនកិច្ចផ្លូវរដ្ឋ នៅ​រដ្ឋធានីបាកដាដនៃ​ប្រទេស​អ៊ីរ៉ាក់ ដើម្បីជួបពិភាក្សាជាមួយ​មេដឹកនាំអ៊ីរ៉ាក់ ជុំវិញការពង្រឹងទំនាក់ទំនង​រវាងប្រទេសទាំងពីរ។ នេះបើតាមការដកស្រង់ការ​ផ្សាយចេញពីទីភ្នាក់ងារព័ត៌មានចិន ស៊ីនហួរ នៅល្ងាចថ្ងៃចន្ទ ទី១៤ ខែមករា ឆ្នាំ២០១៩។

ព្រះចៅ Abdullah ទី២ បានយាងមកដល់អាកាសយានដ្ឋាន​ទីក្រុងបាកដាដ ​ក្រោមការទទួលយ៉ាងកក់ក្តៅពី​សំណាក់​​ប្រធានា​ធិបតីអ៊ីរ៉ាក់ លោក Barham Salih ហើយ​ព្រះអង្គនិងលោក Salih ត្រូវគេរំពឹងថានឹងបើកកិច្ចពិភាក្សាគ្នា ជុំវិញបញ្ហានយោបាយ​ក៏ដូចជាសេដ្ឋកិច្ចសំខាន់ៗ។

គួជម្រាបថា ក្រៅពីនេះ ព្រះចៅ Abdullah ទី២ ក៏នឹងត្រូវយាងជួបជាមួយ​នាយករដ្ឋមន្រ្តីអ៊ីរ៉ាក់ លោក Adel Abdul Mahdi ផង​ដែរ ដើម្បីជជែក​ពីមធ្យោបាយសំដៅលើកកម្ពស់កិច្ចសហប្រតិបត្តិការក្នុងវិស័យផ្សេងៗ។ លើកចុងក្រោយដែលព្រះចៅ Abdullah ទី២ បានយាងមកទស្សនកិច្ចនៅអ៊ីរ៉ាក់ គឺកាលពីឆ្នាំ២០០៨៕