(សេអ៊ូល)៖ ប្រភពពីមន្រ្តីយោធា​កូរ៉េខាងត្បូង​បានឲ្យដឹងថា ប្រទេសអាស៊ីខាង​កើតមួយនេះ នឹងទទួលបាន​យន្តហោះ​ចម្បាំង​​​ F-35A ជាលើកដំបូង​ពីសហរដ្ឋអាមេរិក​ នៅខែមីនាខាងមុខ ក្រោយការរង់ចាំ​អស់រយៈពេល​ជាង៤ឆ្នាំ។ នេះ​បើ​តាម​ការ​​ដក​ស្រង់​ការ​ផ្សាយ​​ចេញ​ពី​សារ​ព័ត៌​មាន South China Morning Post នៅរសៀល​ថ្ងៃចន្ទ ទី១៤ ខែមករា ឆ្នាំ២០១៩។

កូរ៉េខាងត្បូងនឹង​ទទួលបានយន្តហោះ​ចម្បាំងបំបាំងកាយ F-35A ចំនួន ០២គ្រឿង​ដំបូងនៅខែមីនា ហើយពួកវា​នឹងត្រូវដាក់ឲ្យ​​ធ្វើ​ប្រតិបត្តិការ​នៅខែមេសា ឬក៏ខែឧសភា ខណៈ​​យន្តហោះ F-35A សរុបចំនួន ១០គ្រឿងទៀត នឹងរួចរាល់សម្រាប់ការដាក់​ពង្រាយនៅ​​ចុង​ឆ្នាំនេះ ហើយនឹងកើន​ដល់ ៤០គ្រឿងនៅដំណាច់​ឆ្នាំ២០២១។

ប្រទេស​កូរ៉េខាងត្បូង ស្ថិតក្នុងចំណោម​សម្ព័ន្ធមិត្ត​​របស់សហរដ្ឋអាមេរិក ដែលបានទិញ​យន្តហោះចម្បាំងដ៏​ទំនើប​នេះ ដោយ​ក្នុង​​នោះ​រួម​មានទាំងជប៉ុន និងអូស្រ្តាលីផងដែរ។ កាលពី​​ខែកញ្ញា ឆ្នាំ២០១៤ កូរ៉េខាងត្បូង បានអនុញ្ញាតឲ្យមានកិច្ចព្រមព្រៀង​​មួយ ដើម្បី​ទិញយន្តហោះ​ចម្បាំង F-35A ចំនួន ៤០គ្រឿង​ក្នុងតម្លៃ​ ៦.៨ពាន់លានដុល្លារ ពីសហរដ្ឋអាមេរិក។

គួរជម្រាបថា កាលពី​ចុងខែមុន ប្រធានាធិបតី​កូរ៉េខាងត្បូង​បានអំពាវនាវ​​យ៉ាងទទូច​ឲ្យ​មានការ​ពង្រឹង​វិស័យការពារជាតិ​ឲ្យ​កាន់​តែរឹងមាំ​ថែមទៀត ទោះបីជាកិច្ចចរចា​បាននិងកំពុងតែប្រព្រឹត្ត​ទៅ ជាមួយកូរ៉េខាងជើង​យ៉ាងណាក្តី ដោយលោក​បាន​សង្កត់ធ្ងន់​ថា ទាល់តែមានយោធា​រឹងមាំទើបអាចរក្សា​សន្តិភាព បាន​ស្ថិតស្ថេរយូរអង្វែង៕