(ហ្សាការតា)៖ ប្រអប់ខ្មៅទីពីរ​របស់យន្តហោះ​នៃក្រុមហ៊ុនអាកាសចរណ៍ Lion Air ដែលបានធ្លាក់​នៅសមុទ្រជ្វាភាគខាងលិច​​ប្រទេស​ឥណ្ឌូណេស៊ី​ កាលពីចុងខែតុលា ឆ្នាំ២០១៨ ទីបំផុតត្រូវបាន​ក្រុមជំនាញរកឃើញហើយ។ នេះបើតាម​ការដកស្រង់​ការផ្សាយចេញពី ​​ទីភ្នាក់ងារព័ត៌​មានចិន​ស៊ីនហួរ នារសៀលថ្ងៃចន្ទ ទី១៤ ខែមករា ឆ្នាំ២០១៩។

ដំណឹងខាងលើ​ត្រូវបានប្រកាសឲ្យដឹង ពី​សំណាក់អ្នកនាំពាក្យក្រសួង​ដឹកជញ្ជូន​ឥណ្ឌូណេស៊ី លោក ហេងគី អាំងកាសាវ៉ាន (Hengky Angkasawan)​ ដោយវាគឺជាប្រអប់ខ្មៅ​មានផ្ទុកនូវខ្សែអាត់សំឡេង​សន្ទនា ក្នុងបន្ទប់របស់​អ្នកបើកយន្តហោះ និងត្រូវបាន​រកឃើញ​​ដោយ​ក្រុមអ្នក​មុជទឹកនាព្រឹក​ថ្ងៃចន្ទនេះ​។

គួរជម្រាបថា យន្តហោះជើងហោះហើរ JT610 នៃក្រុមហ៊ុន​​អាកាសចរណ៍ក្នុងស្រុក​ឥណ្ឌូណេស៊ី Lion Air បាន​ដាច់​ការ​ទាក់​ទង​​បន្ទាប់ពីវាបានហោះចាកចេញ​ពី​រដ្ឋធានី​ហ្សាការតា ដើម្បីឆ្ពោះ​ទៅ​កាន់​ទីក្រុង ផាំងកាល់ ភីណាង (Pangkal Pinang) បាន ១៣នាទី ​និង​ផ្តាច់ជីវិត​មនុស្ស​ទាំង ​​១៩៨នាក់ ដែលធ្វើដំណើរលើនោះ ​ហើយវាគឺជា​ករណី​​ធ្លាក់​​ដំបូង​​បង្អស់​នៃ​យន្តហោះ​ស៊េរីថ្មី Boeing 737 MAX ដែលលក់ដាច់​បំផុតក្នុង​ប្រវត្តិសាស្ត្រ Boeing៕