(ប៊ែរឡាំង)៖ ក្រសួងការបរទេសអាល្លឺម៉ង់បានចាត់ទុក លិខិតដែលឯកអគ្គរដ្ឋទូតអាមេរិកប្រចាំទីក្រុងប៊ែរឡាំង ផ្ញើទៅកាន់បណ្តាក្រុមហ៊ុនអាល្លឺម៉ង់ ដែលបានចូលរួមក្នុងគម្រោងតភ្ជាប់បណ្តាញបំពុងផ្គត់ផ្គង់ឧស្ម័ន Nord Stream 2 ថា ជាទង្វើបង្កហេតុថ្មីមួយផ្សេងទៀត។ នេះបើតាមសេចក្តីរាយការណ៍របស់កាសែតអាល្លឺម៉ង់ ហេឌែលស៍ប្លេត (Handelsblatt) ដកស្រង់ការផ្សាយដោយសារព័ត៌មានរុស្ស៊ី Sputnik នៅព្រឹកថ្ងៃចន្ទ ទី១៤ ខែមករា ឆ្នាំ២០១៩។
កាលពីថ្ងៃអាទិត្យ ប្រព័ន្ធផ្សព្វផ្សាយព័ត៌មានអាល្លឺម៉ង់បានចុះផ្សាយថា ឯកអគ្គរដ្ឋទូតអាមេរិក លោក រីឆាដ គ្រីនែល (Richard Grenell) បានផ្ញើលិខិតទៅកាន់ក្រុមហ៊ុនអាល្លឺម៉ង់ និងបានបង្ហើបថា ក្រុមហ៊ុនទាំងនោះអាចនឹងទទួលរងទណ្ឌកម្មពីទីក្រុងវ៉ាស៊ីនតោន ចំពោះការគាំទ្រគម្រោង Nord Stream 2។ ចំណែកអ្នកនាំពាក្យលោក Grenell បាននិយាយថា លិខិតរបស់លោកមិនគួរត្រូវចាត់ទុកថា ជាការគំរាមកំហែងនោះទេ ប៉ុន្តែជាការបញ្ជាក់ច្បាស់ៗអំពីគោលនយោបាយរបស់សហរដ្ឋអាមេរិក។
បើតាមកាសែត Handelsblatt ក្រុមហ៊ុននានាដែលបានទទួលលិខិតពី លោក Grenell បានស្នើសុំការណែនាំពីក្រសួងការបរទេសអាល្លឺម៉ង់ថា តើគួរឆ្លើយតបបែបណាចំពោះការគំរាមកំហែងបែបនេះ ហើយក្រសួងបានប្រាប់ក្រុមហ៊ុនទាំងនោះកុំឲ្យធ្វើការឆ្លើយតបអ្វីទាំងអស់ និងបានចាត់ទុកវាថា គឺជាទង្វើបង្កហេតុ។
គួរជម្រាបថា Nord Stream 2 គឺជាផែនការរួមគ្នារវាងក្រុមហ៊ុនឧស្ម័នរុស្ស៊ី Gazprom និងក្រុមហ៊ុនអឺរ៉ុប ០៥ទៀត ដែលមានគោលដៅផ្គត់ផ្គង់ឧស្ម័នធម្មជាតិប្រមាណ ៥៥ពាន់លានម៉ែត្រគូបពីប្រទេសរុស្ស៊ីជារៀងរាល់ឆ្នាំ ទៅឲ្យសហភាពអឺរ៉ុបតាមសមុទ្របាល់ទិច និងប្រទេសអាល្លឺម៉ង់។ ប្រទេសអឺរ៉ុបមួយចំនួនបានស្វាគមន៍ចំពោះគម្រោងនេះ រីឯខ្លះទៀតមិនស្វាគមន៍នោះឡើយ ដោយពួកគេយល់ថា វានឹងធ្វើឲ្យអឺរ៉ុបកាន់តែពឹងផ្អែកខ្លាំងទៅលើឧស្ម័នរបស់រុស្ស៊ី។ ចំណែកសហរដ្ឋអាមេរិកវិញ ក៏បានព្យាយាមជំទាស់ជាខ្លាំងជុំវិញគម្រោង Nord Stream 2 ផងដែរ៕
