(វ៉ាស៊ីនតោន)៖ សមាគមអ្នកគ្រប់គ្រងចរាចរណ៍ផ្លូវអាកាសជាតិអាមេរិក ហៅកាត់ថា NATCA នាថ្ងៃសុក្រសប្តាហ៍នេះ បានសម្រេចប្តឹងរដ្ឋាភិបាលសហព័ន្ធដែលកំពុងបន្តស្ថិតក្នុងសភាពបិទទ្វារ ដោយសារសមាជិករបស់ខ្លួនកំពុងបំពេញការងារ ដោយពុំបានទទួលប្រាក់ឈ្នួលនោះឡើយ។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសៅរ៍ ទី១២ ខែមករា ឆ្នាំ២០១៩។
ពាក្យបណ្តឹងខាងលើត្រូវបានដាក់ទៅតុលាការសហព័ន្ធ នៅក្នុងរដ្ឋធានីវ៉ាស៊ីនតោន ដោយក្នុងនោះបានបញ្ជាក់ថា រដ្ឋាភិបាលសហព័ន្ធកំពុងរំលោភលើច្បាប់ Fifth Amendment នៃរដ្ឋធម្មនុញ្ញអាមេរិក ដោយសារតែរដ្ឋាភិបាលមិនបានផ្តល់ប្រាក់ឈ្នួលដែលសមាជិក NATCA រកបានដោយពុំមាននីតិវិធីត្រឹមត្រូវ តាមច្បាប់នោះឡើយ។
សមាគម NATCA បានចោទរដ្ឋាភិបាលអាមេរិកទៀតថា បានបំពានលើច្បាប់ស្តង់ដានៃតម្លាភាពពលកម្ម ដោយសារតែមិនផ្តល់ឲ្យបុគ្គលិកគ្រប់គ្រងចរាចរណ៍ផ្លូវអាកាស យ៉ាងហោចណាស់នូវប្រាក់ឈ្នួលអប្បបរមា និងដោយសារទីភ្នាក់ងាររដ្ឋត្រួតពិនិត្យ សេវាចរាចរណ៍ផ្លូវអាកាស (FAA) មិនបានផ្តល់ប្រាក់ឈ្នួលលើសម៉ោងដល់ពួកគេ ក្នុងអំឡុងនៃការបិទទ្វាររដ្ឋាភិបាល។ NATCA តំណាងឲ្យបុគ្គលិករបស់ស្ថាប័ន FAA ប្រមាណ ១៩,០០០នាក់ ដែលក្នុងនោះមានអ្នកគ្រប់គ្រងចរាចរណ៍ផ្លូវអាកាស ១៤,០០០នាក់ ផងដែរ។
គួរជម្រាបថា ការបិទទ្វារនៃរដ្ឋាភិបាលអាមេរិក បានបន្តអូសបន្លាយដល់រយៈពេល ២១ថ្ងៃហើយ គិតត្រឹមថ្ងៃសុក្រសប្តាហ៍នេះ (ពេលវេលានៅអាមេរិក) ហើយបើបន្តឈានដល់ថ្ងៃសៅរ៍ វានឹងបំណែកកំណត់ត្រាចាស់កាលពីឆ្នាំ១៩៩៥-១៩៩៦ ក្លាយជាការបិទទ្វាររដ្ឋាភិបាលសហព័ន្ធរបស់អាមេរិក ដែលមានរយៈពេលយូរជាងគេបង្អស់ក្នុងប្រវត្តិសាស្ត្រ។
ដោយសារតែបញ្ហានេះ បុគ្គលិករដ្ឋប្រហែល ៨០០,០០០នាក់ ដែលត្រូវបានបង្ខំឲ្យផ្អាកការងារ ឬក៏ធ្វើការងារដោយពុំបានប្រាក់ឈ្នួលចាប់តាំងពីថ្ងៃទី២២ ខែធ្នូ ឆ្នាំ២០១៨ ជាពេលដែលការបិទទ្វារបានចាប់ផ្តើម ត្រូវខកខានមិនអាចបើកប្រាក់ខែបាននៅថ្ងៃសុក្រ ដែលជាថ្ងៃត្រូវបើកប្រាក់ខែ។ ការបិទរដ្ឋាភិបាលនេះ គឺដោយសារតែលោក ដូណាល់ ត្រាំ នៅតែរក្សាជំហរទាមទារកញ្ចប់ប្រាក់កសាងព្រំដែនជាមួយម៉ិចស៊ីកូ ប្រមាណជាង៥ពាន់លានដុល្លារ ខណៈសមាជិកសភាបក្សប្រជាធិបតេយ្យ ក៏រក្សាជំហរមិនព្រមអនុម័តដូចគ្នា៕
