(តៃប៉ិ)៖ ប្រធានាធិបតី​កោញតៃវ៉ាន់ លោកស្រី ត្សៃ អ៊ីងវិន (Tsai Ing-wen) នៅថ្ងៃសុក្រនេះ បានតែងតាំង​អតីតប្រធានគណបក្ស​កាន់អំណាច​របស់លោកស្រីសព្វ​ថ្ងៃ ជានាយករដ្ឋមន្ត្រីថ្មី បន្ទាប់ពី​នាយករដ្ឋមន្ត្រី​បច្ចុប្បន្ន និងគណៈរដ្ឋមន្ត្រី​ទាំងមូលលាចេញ​ពីតំណែង​ កាលពីថ្ងៃព្រហស្បតិ៍។​ នេះបើ​តាមការចេញផ្សាយដោយ​ទីភ្នាក់ងារ​សារព័ត៌មាន Reuters នៅល្ងាចថ្ងៃសុក្រ ទី១១ ខែមករា ឆ្នាំ២០១៩។

​លោកស្រី Tsai បានសម្រេច​ចិត្តតែងតាំងអតីតប្រធាន​ គណបក្ស​ប្រជាធិបតេយ្យ​ជឿនលឿន​ (DPP) លោក ស៊ូ ត្សេងឆាង (Su Tseng-chang) ជានាយករដ្ឋមន្ត្រី​តៃវ៉ាន់ថ្មី​ ដោយអះអាងថា ទីក្រុងតៃប៉ិ​កំពុងជួបបញ្ហាប្រឈម​ជាច្រើន​នៅក្នុងស្រុក និងការគំរាមកំហែង​ជាថ្មីសំណាក​រដ្ឋាភិបាលចិនដីគោក។ ប្រធានាធិបតី​តៃវ៉ាន់រូបនេះ​បានបន្ថែម​យ៉ាងដូច្នេះថា «ប្រជាធិបតេយ្យ និងការអភិវឌ្ឍ​របស់កោះតៃវ៉ាន់​កំពុងជួបបញ្ហា​ប្រឈមជាច្រើន ខណៈចិនកាន់តែ​បង្កើនការគំរាមកំហែ​ងប្រើប្រាស់កម្លាំងយោធា ក៏ដូចជាបង្ខំឱ្យ​តៃវ៉ាន់ទទួលយក​ប្រទេសមួយ​ប្រព័ន្ធគ្រប់គ្រង ២ ជាដើម។

គួរបញ្ជាក់ថា ការតែងតាំង​លោក Su Tseng-chang ជានាយករដ្ឋមន្ត្រី​តៃវ៉ាន់ថ្មី ធ្វើឡើងបន្ទាប់ពី​លោក វីលៀម ឡៃ (William Lai) ដែលជានាយករដ្ឋមន្ត្រីមុន និងគណៈរដ្ឋមន្ត្រី​របស់លោក​ បានប្រកាសលាលែងពីតំណែងកាលពី​ថ្ងៃព្រហស្បតិ៍ ជាការទទួលខុសត្រូវ​ចំពោះបរាជ័យរបស់​គណបក្ស DPP នៅក្នុងការបោះឆ្នោត​ថ្នាក់តំបន់កាលពី​ខែវិច្ឆិកា ឆ្នាំ២០១៨។ ម្យ៉ាវិញ​ទៀត លោក Lai នឹងក្លាយជា​​នាយករដ្ឋមន្ត្រី​តៃវ៉ាន់ទី ២ ដែលលាលែង​ចេញពីតំណែង​ចាប់តាំងពី​លោកស្រី Tsai ឡើងកាន់តំណែង​ជាប្រធានាធិបតី​ កាលពីឆ្នាំ២០១៦ មក៕