(អាមេរិក)៖ ម៉ាស៊ីនថតនៃកែវយឺតអវកាស Hubble របស់អង្គការ NASA បានខូចគាំងជាថ្មីម្តងទៀត ហើយ​លើកនេះ​អាច​​នឹងអូសបន្លាយពេលយូរជាងមុនទៅទៀត ដោយសារតែបុគ្គលិករបស់ NASA មិនអាចធ្វើការជួសជុលវាបាន ពីព្រោះតែ​​​បញ្ហាបិទទ្វារដ្ឋាភិបាលអាមេរិក។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅរសៀលថ្ងៃព្រហស្បតិ៍ ទី១០ ខែមករា ឆ្នាំ២០១៩។

ទីភ្នាក់ងារអវកាសអាមេរិក NASA បានឲ្យដឹងថា កាមេរ៉ាប្រភេទ Wide-field ដែលជាឧបករណ៍ចម្បងដ៏សំខាន់​នៅលើ​​កែវយឺត Hubble បានឈប់ដំណើរការកាលពីថ្ងៃទី០៨ ខែមករា ដោយសារតែបញ្ហាផ្នែក Hardware របស់វា ប៉ុន្តែ​ក្រុម​វិស្វករនឹងមិនអាចជួសជុលកែវយឺតអវកាសនេះបានឡើយ រហូតទាល់តែរដ្ឋាភិបាលសហព័ន្ធ​បើកទ្វារឡើងវិញ។ បញ្ហា​បិទទ្វារ​រដ្ឋាភិបាលអាមេរិក បានបង្ខំឲ្យ​បុគ្គលិកអង្គការ NASA ប្រមាណ៩៥ភាគរយ ត្រូវផ្អាកការងារ។

ម៉ាស៊ីនថតដែលខូច​គឺកាមេរ៉ា Wide Field Camera 3 របស់ Hubble ។ កែវយឺតអវកាសនេះ នៅមានកាមេរ៉ាមួយទៀត រួម​ជាមួយឧបករណ៍ Spectrograph ពីរគ្រឿង ដែលនៅដំណើរការនិងកំពុងប្រមូលទិន្នន័យជាធម្មតា។ កាលពីដើម​ខែ​តុលា ឆ្នាំ២០១៨ កែវយឺតអវកាស Hubble បានគាំងដំណើរទាំងស្រុងអស់រយៈពេល០៣សប្តាហ៍ ក្រោយពី​ឧបករណ៍ទប់លំនឹង​និងតម្រង់ទិសដៅ Gyroscope មួយគ្រឿងរបស់វាខូច។

គួរជម្រាបថា Hubble ត្រូវបាន NASA បាញ់បង្ហោះឡើងទីអវកាសកាលពីឆ្នាំ១៩៩០ ដែលគិតមកទល់ពេលនេះ គឺជិត​៣០​ឆ្នាំហើយ។ កែវយឺតអវកាសនេះ ត្រូវបានកែលម្អនិងអាប់ដេត​០៥លើក ដោយក្រុមអវកាសយានិក ដែលលើកចុង​ក្រោយគឺនៅឆ្នាំ២០០៩ ហើយកាមេរ៉ា Wide Field Camera 3 ត្រូវបានដំឡើងនៅលើវា កាលពីអំឡុងពេលនោះ៕