(វ៉ាស៊ីនតោន)៖ ក្រុមហ៊ុន​ផលិតយន្តហោះ​ប្រភេទ VTOL (ហោះហើរ និងចុះចតស្រដៀង​ឧទ្ធម្ភាគចក្រ) Bell ដែលកំពុង​អភិ​វឌ្ឍន៍​​យានជំនិះហោះដឹកអ្នកដំណើរហៅថា «Nexus» បានប្រកាសឲ្យដឹងថា យានជំនិះ​ដ៏អស្ចារ្យដូចក្នុង​ខ្សែភាពយន្ត​នេះ​នឹងត្រូវដាក់​ឲ្យធ្វើប្រតិបត្តិការ​តាមរយៈសេវា​តាក់ស៊ី Uber នៅខ្ទង់​ឆ្នាំ២០២៥។ នេះបើតាមការ​ដកស្រង់ការផ្សាយ​ចេញពី​​​​សារព័ត៌មានរុស្ស៊ី Spiutnik នៅរសៀលថ្ងៃអង្គារ ទី០៨ ខែមករា ឆ្នាំ២០១៩។

ក្រុមហ៊ុន Bell បានបញ្ជាក់យ៉ាងដូច្នេះថា «នេះពុំមែនជារបស់​ក្មេងលេងឡើយ។ នេះគឺជា​យានជំនិះមួយ ដែលធ្វើឲ្យ​អ្នក​​មាន​អារម្មណ៍សុត្ថិភាព និងមាន​ផាសុខភាព​ក្នុងពេលធ្វើដំណើរ​ជាមួយក្រុមគ្រួសារ​របស់អ្នក»។ យានជំនិះ Nexus នឹង​អាច​​ដឹកអ្នកដំណើរ​បាន​ ០៥នាក់ ជាមួយទម្ងន់​​ប្រហែល​ ២៧២គីឡូក្រាម ហើយវាប្រើ​ម៉ាស៊ីន​លក្ខណៈ​ Hybrid។

ដោយឡែកបើ​តាមក្រុមហ៊ុន Uber វិញ មានតែយានជំនិះប្រភេទ VTOL ដែលប្រើថាមពលអគ្គីសនីទាំងស្រុងប៉ុណ្ណោះ នឹង​ត្រូវបញ្ចូលទៅក្នុងសេវាតាក់ស៊ីផ្លូវអាកាស​របស់ខ្លួន ប៉ុន្តែបានកត់​សម្គាល់ថា គំរូយាន Nexus របស់ Bell គឺជំហានដំបូង​​ដ៏​សំខាន់មួយ ដើម្បីឆ្ពោះទៅរក​ការសម្រេច​គោលដៅនេះ។

គួរជម្រាបថា យានជំនិះ Nexus នឹងប្រើកង្ហារចំនួន ០៦ ដើម្បីហោះឡើង និងចុះត្រង់ដូច​ឧទ្ធម្ភាគចក្រ ចេញពីដំបូង​អគារ​ ឬ​ក៏​​ទីតាំង Launch ដែលបាន​កំណត់ទុក៕