(ហាណូយ)៖ ប្រទេសវៀតណាមទទួលចំណូលបានខ្ទង់ ៤.៦ពាន់លានដុល្លារ ពីការលក់ផលិតផលដែកទៅក្រៅប្រទេស កាលពីឆ្នាំ២០១៨។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅរសៀលថ្ងៃចន្ទ ទី០៧ ខែមករា ឆ្នាំ២០១៩។
បើតាមទិន្នន័យពីសហគមន៍ផលិត និងចែកចាយផលិតផលដែកនៃប្រទេសវៀតណាម VSA នៅថ្ងៃចន្ទនេះ វៀតណាមរកបានថវិកាបានប្រហែល ៤.៦ពាន់លានដុល្លារ ពីការនាំចេញផលិតផលដែកសរុបជាទម្ងន់ប្រមាណ ៦.៣លានតោន ដែលជាអត្រាកើនឡើងគួរឲ្យកត់សម្គាល់ ចូលទៅកាន់ទីផ្សារសំខាន់ៗរបស់ខ្លួន រួមមានសហរដ្ឋអាមេរិក ជប៉ុន ថៃ និងកម្ពុជា ជាដើម ។
គួរជម្រាបថា ឆ្នាំទៅមិញនេះប្រទេសវៀតណាម ក៏បាននាំចូលនូវផលិតផលដែកជិត ១៣.៦លានតោនដែលស្មើនឹងជិត ៩.៩ពាន់លានដុល្លារផងដែរពីចិន ជប៉ុន និងកូរ៉េខាងត្បូង ប៉ុន្តែបើធៀបនឹងឆ្នាំ២០១៧ គឺពុំមានការកើនឡើងខ្លាំងឡើយ៕
