(វ៉ាស៊ីនតោន)៖ កាលពីសប្ដាហ៍មុននាយកប្រតិបត្តិ (CEO) ក្រុមហ៊ុន Apple លោក ធីម ឃុក (Tim Cook) បានព្រមានក្រុម​អ្នកវិយោគថា ក្រុមហ៊ុនរបស់​លោកកំពុងប្រឈមមុខ​នឹងការលក់ធ្លាក់ចុះយ៉ាងខ្លាំង​នូវទូរស័ព្ទដៃ iPhone នៅក្នុង​ប្រទេសចិន ជាទីដែល​ទូរស័ព្ទដៃ Huawei បាននិងកំពុង​ធ្វើឱ្យជោគវាសនា​ក្រុមហ៊ុនយក្ស​អាមេរិកមួយនេះ​ មានភាព​ស្រពិចស្រពិល​ក្នុងទីផ្សារចិន ដែលទីផ្សារធំផ្តាច់គេលើសកលលោក។ នេះបើតាម​ការចេញ​ផ្សាយ​ដោយសារព័ត៌មានអាមេរិក New York Times នៅព្រឹកថ្ងៃចន្ទ ទី០៧ ខែមករា ឆ្នាំ២០១៩។

ការលក់ធ្លាក់​ចុះនៃទូរស័ព្ទ iPhone នៅក្នុង​ប្រទេសចិន ត្រូវបានអ្នកជំនាញ​មួយចំនួនយល់ថា ដោយសារតែ​ការរីកធំធាត់នៃ​ទូរស័ព្ទដៃ​ស្មាតហ្វូនចិន ដូចជា Huawei ជាដើម ដែលកំពុងប្រជែង​យ៉ាងខ្លាំង ជាមួយទូរស័ព្ទ​ដៃម៉ាកសញ្ញាផ្លែប៉ោម​មួយនេះ ជាពិសេសគឺ​ទៅលើ​តម្លៃលក់​នៅលើទីផ្សារតែម្ដង។

ពោល​គឺជារួម ប្រជាជនចិនមាន​ជីវភាពមធ្យម​បានប្ដូរទូរស័ព្ទដៃ iPhone របស់ពួកគេ​មកប្រើ Huawei ជំនួសវិញ ពីព្រោះវាជាផលិតផល​នៅក្នុងស្រុក មានបច្ចេកវិទ្យាទំនើប​អាចទទួល​យកបាន និងមានតម្លៃថោក​សមរម្យ ដោយក្នុងមួយ គ្រឿងនៃស៊េរី​ទូរស័ព្ទខ្លះមានតម្លៃទាប​ជាង ១៥០ដុល្លារ តែអាចលេង Internet ព្រមទាំងមាន​កម្មវិធីមួយចំនួនដូច​ទូរស័ព្ទដៃស្មាត ហ្វូនយក្សដទៃៗទៀត ដែលមានតម្លៃថ្លៃដែរ។

គួរបញ្ជាក់ថា CEO ក្រុមហ៊ុន Apple លោក Tim Cook បានបន្ទោសថា ការលក់​ធ្លាក់ចុះនៃ iPhone ក្នុងឆ្នាំ២០១៨ គឺដោយសារតែ​​សង្រ្គាមពាណិជ្ជកម្មរវាង​សហរដ្ឋអាមេរិក និងចិន ដែលបានអូសបន្លាយជាច្រើនខែ រហូតមកទល់នឹងដើមឆ្នាំ២០១៩នេះ។ សង្រ្គាម​​ពាណិជ្ជកម្មបានបង្ខំឱ្យចិន​ ចាត់វិធានការជាបន្តបន្ទាប់​​ក្នុងនោះ​ក៏មាន​គោលដៅរាំងខ្ទប់លើ​ការលក់ទូរស័ព្ទ iPhone ផងដែរ ជាការឆ្លើយតបទៅ​នឹង​ការរុកគួន​របស់​សហរដ្ឋអាមេរិក ទៅលើ​​ក្រុមហ៊ុន​យក្សចិន Huawei ដូចគ្នា៕