(បាងកក)៖ ក្រសួងពាណិជ្ជកម្មថៃបាននិងកំពុង​ត្រៀមរៀបចំ​យានជំនិះ​ដឹក​ស្បៀងអាហារ ដូចជាអង្ករ ស៊ុត ប្រេង ត្រីខ មីកំប៉ុង និងឧបករណ៍សំខាន់ៗ សម្រាប់ផ្តល់ជូនជនដែលរងគ្រោះ ដោយសារព្យុះត្រូពិច Pabuk នៅតាមតំបន់ភាគត្បូង​នៃប្រទេសថៃ។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅរសៀលថ្ងៃអាទិត្យ ទី០៦ ខែមករា ឆ្នាំ២០១៩។

ជាមួយគ្នានេះ ធនាគារ Government Housing Bank (GHB) ដែល​បង្កើតឡើងដោយ​អតីតព្រះមហាក្សត្រថៃ ព្រះបាទ ភូមិបុល អាប់ឌុលយ៉ាដេត ក៏បានផ្តល់កញ្ចប់ឥណទានទំហំ​១ពាន់លានបាត ស្មើនឹងជាង៣១លានដុល្លារ សម្រាប់​ប្រជា​ជន​ដែលលំនៅឋានបានរងការខូចខាតដោយសារព្យុះ Pabuk ផងដែរ។ រដ្ឋមន្រ្តីពាណិជ្ជកម្មថៃ Sontirat Sontijirawong បាន​ឲ្យដឹងថា ​ប្រជាពលរដ្ឋអាចស្វែងរកកញ្ចីបន្ថែមនិងកញ្ចីថ្មីពីធនាគារ GHB បានថែមទៀត ដើម្បីសាងសង់​លំនៅឋានថ្មី ​បើ​សិនជាផ្ទះរបស់ពួកគេ​ត្រូវបានបំផ្លាញទាំងស្រុងដោយគ្រោះធម្មជាតិ។

គួរជម្រាបថា ព្យុះត្រូពិច Pabuk បានផ្តាច់ជីវិតមនុស្ស០៤នាក់ និងបង្ខំឲ្យរាប់ពាន់នាក់ជម្លៀសខ្លួនជាពីផ្ទះសម្បែង​។ អាជ្ញា​ធរឧតុនិយមថៃ បានឲ្យដឹងថា វាគឺជារឿងចម្លែកខ្លាំងមួយ ដែលព្យុះត្រូពិចបានបោកបក់មកចំប្រទេសថៃបែបនេះ។ លើក​ចុងក្រោយដែលព្យុះត្រូពិចបានវាយប្រហារលើប្រទេសថៃ គឺកាលពីឆ្នាំ១៩៦២ នៅពេលព្យុះឈ្មោះថា Harriet បានវាយ​លុកខេត្តចំនួន១២ និងឆក់យកជីវិតមនុស្ស៩០០នាក់។ ម៉្យាងវិញទៀត ក៏ពុំមានកំណត់ស្តីពីព្យុះត្រូពិច ដែលបានវាយ​លុក​ប្រទេសថៃ នៅអំឡុងខែមករា កុម្ភៈ ឬក៏មីនា នោះដែរ គិតចាប់តាំងពីឆ្នាំ១៩៥១មក៕