(អាមេរិក)៖ បច្ចុប្បន្នលទ្ធិប្រជាធិបតេយ្យនៅជុំវិញពិភពលោក ហាក់ដូចជាស្ថិតនៅក្នុងកណ្តាប់ដៃរបស់មនុស្សតែ០៣នាក់ប៉ុណ្ណោះ ដែលអាចចាត់ទុកថាជា «អធិរាជនៃបណ្តាញអ៊ីនធើណែត» គឺនាយកក្រុមហ៊ុន Facebook លោក Mark Zuckerberg នាយក Twitter លោក Jack Dorsey និង នាយក Google លោក Sundar Pichai។ នេះបើតាមការដកស្រង់ការផ្សាយចេញពីសារព័ត៌មាន Daily Nation នៅព្រឹកថ្ងៃអាទិត្យ ទី០៦ ខែមករា ឆ្នាំ២០១៩។
បុគ្គលទាំងបីនាក់នេះ ត្រូវគេមើលឃើញថាគឺជា សសរស្នូលនៃលទ្ធិប្រជាធិបតេយ្យសព្វថ្ងៃ ដោយពួកគេជាអ្នកគ្រប់គ្រងលើបណ្តាញទំនាក់ទំនងដ៏មានឥទ្ធិពល ដែលមានសារសំខាន់ជាខ្លាំង ចំពោះសង្គមប្រជាធិបតេយ្យនៅជុំវិញពិភពលោក។
*ការឃោសនាបំភ្លៃព័ត៌មាន
Facebook ដែលមានអ្នកប្រើប្រាស់ប្រមាណ០២ពាន់លាននាក់ គឺជាឧបករណ៍យ៉ាងសំខាន់មួយ ក្នុងការកំណត់អំណាចនយោបាយនៃបណ្តាប្រទេសភាគច្រើន។ អ្វីដែលធ្វើឲ្យរបបដឹកនាំនយោបាយ ជុំវិញពិភពលោក មានការភ័យខ្លាចនោះ គឺការដែល Facebook និងបណ្តាញសង្គមដទៃទៀត ត្រូវបានប្រើប្រាស់ក្នុងផ្លូវអាក្រក់ ដើម្បីដឹកមុខឆន្ទៈរបស់មនុស្សរាល់គ្នានៅក្នុងផ្នែកនយោបាយ តាមរយៈការបង្កើតនិងចែកចាយព័ត៌មានបំភ្លៃ។
ដូច្នេះហើយទើប Facebook បានទទួលការរិះគន់ជាខ្លាំង និងត្រូវចោទប្រកាន់ថា បានជួយរុស្ស៊ីជះឥទ្ធិពលលើដំណើរការបោះឆ្នោតជ្រើសរើសប្រធានាធិបតីអាមេរិកកាលពីឆ្នាំ២០១៦។ ប៉ុន្តែការប្រើបណ្តាញសង្គមដើម្បីធ្វើបែបនេះ មិនមែនមាននៅសហរដ្ឋអាមេរិកតែឯងឡើយ។ អ៊ុយក្រែន អាល្លឺម៉ង់ អ៊ីតាលី ប៉ូឡូញ បារាំង សុទ្ធតែធ្លាប់ភ្លក្សរសជាតិ ហើយសូម្បីតែ Brexit (ដំណើរការដកអង់គ្លេសចេញពីសហភាពអឺរ៉ុប) ក៏បានរងឥទ្ធិពលពីការឃោសនាបំភ្លៃព័ត៌មាន តាមបណ្តាញសង្គមផងដែរ។
*ការប៉ះពាល់ដល់សង្គមប្រជាធិបតេយ្យ
សព្វថ្ងៃបណ្តាញសង្គម កំពុងបង្កការគំរាមកំហែងដែលនឹងបំផ្លាញសង្គមប្រជាធិបតេយ្យ ដែលជាអ្នកផ្តល់កំណើតឲ្យពួកវា។ ពីដំបូងឡើយបណ្តាញសង្គម ត្រូវគេសង្ឃឹមថានឹងអាចជួយពង្រីកលទ្ធិប្រជាធិបតេយ្យ នៅពាសពេញពិភពលោក ប៉ុន្តែពួកវាត្រូវបានក្រុមឆ្លៀតឱកាសប្រើប្រាស់ជាកន្លែងផ្សព្វផ្សាយព័ត៌មានមិនពិតយ៉ាងភ្លូកទឹកភ្លូកដីទៅវិញ។
លទ្ធិប្រជាធិបតេយ្យ ពីមួយថ្ងៃទៅមួយថ្ងៃកាន់តែឆ្លុះបញ្ចាំងពី ឆន្ទៈនៃការឃោសនាព័ត៌មានបំភ្លៃ។ ដោយឡែក បណ្តាញសង្គមទាំងនេះ មានឥទ្ធិពលកំណត់ទៅលើការយល់ឃើញ មតិយោបល់ និងការសម្រេចចិត្តរបស់សាធារណជនក្នុងផ្នែកនយោបាយ ដូច្នេះហើយ ពួកវាក៏មានឥទ្ធិពលលើគោលនយោបាយនិងការដឹកនាំផងដែរ និយាយរួមពួកវាជាអ្នកសម្រេចទៅលើអំណាចនយោបាយតែម្តង។
គួរជម្រាបថា ដោយដឹងពីគ្រោះថ្នាក់នៃការចែកចាយព័ត៌មានមិនពិត និងការដែលវាអាចបំផ្លាញមុខមាត់និងចំណូលរបស់ខ្លួន បណ្តាញសង្គមដូចជា Facebook បានចាប់ផ្តើមចាប់ដៃគូជាមួយក្រុមហ៊ុនត្រួតពិនិត្យខ្លឹមសារព័ត៌មាន នៅ២៤ប្រទេស ប៉ុន្តែមិនទាន់មានការបញ្ជាក់ឲ្យដឹងពីប្រសិទ្ធភាពនៃគម្រោងនេះនៅឡើយទេ។ ចំណែកប្រទេសមួយៗផ្ទាល់ ក៏ត្រូវមានភារកិច្ចបង្កើតយន្តការតាមដាន ដើម្បីទប់ស្កាត់ការបំភ្លៃព័ត៌មានផងដែរ។
យ៉ាងណាមិញ អនាគតនៃលទ្ធិប្រជាធិបតេយ្យនៅជុំវិញពិភពលោក នៅតែអាស្រ័យទៅលើបុគ្គលទាំង០៣នាក់ខាងលើដដែលគឺ លោក Zuckerberg, Pichai, និង Dorsey ដែលពុំមាននរណាម្នាក់បានបោះឆ្នោតជ្រើសរើសពួកគេឡើយ ប៉ុន្តែនេះហើយគឺជាសង្គមដែលផ្នែកទៅលើលំហូរព័ត៌មាន នាសម័យបច្ចុប្បន្ន៕
