(ប៉េកាំង)៖ អាជ្ញាធរអាកាសចរណ៍ស៊ីវិលចិនបានឱ្យដឹងថា អាកាសយានដ្ឋានអន្តរជាតិថ្មីក្នុងទីក្រុងប៉េកាំង អាចនឹងទទួលបានអ្នកដំណើរ៤៥លាននាក់នៅឆ្នាំ២០២១ និង ៧២លាននាក់នៅឆ្នាំ២០២៥។ នេះបើតាមការចេញផ្សាយដោយ ទីភ្នាក់ងារសារព័ត៌មានចិនស៊ីនហួរ នៅរសៀលថ្ងៃសៅរ៍ ទី០៥ ខែមករា ឆ្នាំ២០១៩។
អាកាសយានដ្ឋានអន្តរជាតិ Beijing Daxing នឹងត្រូវដាក់ឱ្យដំណើរការនៅក្នុងឆ្នាំ២០១៩នេះ ហើយវាក៏នឹងក្លាយជាអាកាសយានដ្ឋាន ក្នុងក្រុងដែលធំបំផុតមួយផងដែរ ដោយមានរចនាបថដូចជាសត្វផ្កាយសមុទ្រដូច្នោះដែរ។ អាកាសយានដ្ឋាននេះស្ថិតនៅចំងាយ ៤៦គីឡូម៉ែត្រពីភាគខាងត្បូងទីក្រុងប៉េកាំង និងត្រូវបានសាង សង់ឡើងក្នុងគោលបំណងជួយដល់ដោះស្រាយបញ្ហាអ្នកដំណើរច្រើនហួសហេតុ សឹងតែលើសចំណុះនៅឯអាកាសយានដ្ឋានអន្តរជាតិរដ្ឋធានីប៉េកាំង ដែលបានទទួលអ្នកដំណើរជាង ១០០លាននាក់កាលពីឆ្នាំ២០១៨ កន្លងទៅ។
គួរបញ្ជាក់ថា ក្រុមហ៊ុនអាកាសចរណ៍ China Eastern Airlines និង China Southern Airlines នឹងក្លាយជាអ្នកដឹកជញ្ជូនដ៏សំខាន់ នៅឯអាកាសយានដ្ឋានអន្តរជាតិ Beijing Daxing ដែលត្រូវបានគេរំពឹងថា នឹងជួយកាត់បន្ថយចរាចរណ៍អ្នកដំណើរនៅឯអាកាសយាន ដ្ឋានរដ្ឋធានីប៉េកាំង ឲ្យធ្លាក់មកនៅ ៨២លាននាក់ក្នុងមួយឆ្នាំវិញ៕
