(កង់បេរ៉ា)៖ ក្រុមហ៊ុនអាកាសចរណ៍អូស្ត្រាលី Qantas Airways បានជាប់ឈ្មោះជាក្រុមហ៊ុនអាកាសចរណ៍ «មានសុវត្ថិភាពជាងគេបំផុតនៅលើ ពិភពលោក» នៅថ្ងៃព្រហស្បតិ៍សប្ដាហ៍នេះ ហើយនេះក៏ជាលើកទី ៥ ដែលក្រុមហ៊ុនទទួលបានចំណាត់ថ្នាក់នេះដែរ។ នេះបើតាមការចេញផ្សាយដោយសារព័ត៌មាន Channel News Asia នៅល្ងាចថ្ងៃសុក្រ ទី០៤ ខែមករា ឆ្នាំ២០១៩។
Qantas ដែលជាក្រុមហ៊ុនអាកាសចរណ៍ដ៏ចំណាស់បំផុតមួយ ត្រូវបានជ្រើសរើសជាក្រុមហ៊ុនឈរលើលំដាប់កំពូល ផ្នែកសុវត្ថិភាពជាងគេនៅលើពិភពលោក ដោយសារតែភាពជាអ្នកដឹកនាំក្នុងការគំនិតច្នៃប្រឌិតខាងសុវត្ថិភាព។ មិនតែប៉ុណ្ណោះ ក្រុមហ៊ុនអាកាសចរណ៍អូស្ត្រាលីមួយនេះ ក៏កំពុងអភិវឌ្ឍន៍ប្រព័ន្ធ Air Navigation System និងស្ដុកទុកទិន្នន័យដើម្បីត្រួតពិនិត្យរាល់បញ្ហាយន្ដហោះ និងការបើកបររបស់ពីឡុតទៀតផង។
គួរបញ្ជាក់ថា ក្រៅពី Qantas ក្រុមហ៊ុនអាកាសចរណ៍ជាប់ក្នុងបញ្ជីឈ្មោះទាំង ២០ផ្សេងទៀតមានដូចជា Air New Zealand, All Nippon Airways, British Airways, Cathay Pacific Airways, Emirates, Qatar Airways និង Singapore Airlines។ ចំណែកឯ ក្រុមហ៊ុនអាកាសចរណ៍ជាប់លំដាប់ទាបជាងគេខាងសុវត្ថិភាពមាន Ariana Afghan Airlines, Bluewing Airlines, Kam Air និង Trigana Air ជាដើម៕
