(វ៉ាស៊ីនតោន)៖ ជនជាតិអាមេរិកម្នាក់ឈ្មោះ ផូល វីឡេន (Paul Whelan) ដែលត្រូវបានចាប់ខ្លួនក្នុងទីក្រុងម៉ូស្គូពីបទចារកម្ម មិនដែលបានធ្វើដំណើរជាលក្ខណៈពាណិជ្ជកម្មមកកាន់ប្រទេសរុស្ស៊ី នៅអំឡុងពេលលោកបម្រើការងារឱ្យក្រុមហ៊ុន Kelly Services ជាទីដែលលោកបានចំណាយពេល ធ្វើការអស់រយៈពេលជាង ១៥ឆ្នាំនោះទេ។ នេះបើតាមការចេញផ្សាយដោយសារព័ត៌មាន Sputnik នៅរសៀលថ្ងៃសុក្រ ទី០៤ ខែមករា ឆ្នាំ២០១៩។
សារព័ត៌មាន Sputnik ធ្វើសេចក្ដីរាយការណ៍បែបនេះ ដោយផ្អែកលើនាយកទំនាក់ទំនងក្រុមហ៊ុន Kelly Services លោកស្រី ចេន ស្ទេណេយ (Jane Stehney)។ លោកស្រី Stehney បានលើកឡើងយ៉ាងដូច្នេះថា «លោក Whelan គឺជាបុគ្គលិករបស់ក្រុមហ៊ុន ឃែលលី ស៊ឺវិស (Kelly Services) ចាប់តាំងឆ្នាំ២០០១ រហូតដល់ ឆ្នាំ២០១៦... ប៉ុន្តែលោកបានចាកចេញទៅ ដើម្បីទៅបម្រើយោធា ហើយយើងមិនមានព័ត៌មានបញ្ជាក់ថា លោកធ្លាប់ធ្វើដំណើរមកកាន់ប្រទេសរុស្ស៊ីជាលក្ខណៈពាណិជ្ជកម្ម ពាក់ព័ន្ធនឹងក្រុមហ៊ុន Kelly ឡើយ»។
គួរបញ្ជាក់ថា លោក Paul Whelan មានអាយុ ៤៨ឆ្នាំ ត្រូវបានអាជ្ញាធររុស្ស៊ីចាប់ខ្លួនក្នុងទីក្រុងម៉ូស្គូ កាលពីចុងខែធ្នូកន្លងទៅពីបទចារកម្ម។ លោក Whelan បច្ចុប្បន្នគឺជានាយកសន្តិសុខសកល នៃក្រុមហ៊ុនអាមេរិក ប៊កវ៉ាណឺ (BorgWarner) មានមូលដ្ឋាននៅរដ្ឋ មីឈីហ្គែន (Michigan) ហើយមិនតែប៉ុណ្ណោះ បើតាមសារព័ត៌មានមួយចំនួនចេញផ្សាយ លោកក៏ជាអតីតទ័ពជើងទឹកម្នាក់ ព្រមទាំងធ្លាប់ត្រូវតុលាការកាត់ទោសកាលពីឆ្នាំ២០០៨ ពីបទចោរកម្មផងដែរ៕
