(កាណាដា)៖ រដ្ឋាភិបាលកាណាដាបានឱ្យដឹងថា ពលរដ្ឋរបស់ខ្លួនរហូតដល់ ១៣នាក់ឯណោះ ត្រូវបានអាជ្ញាធរចិនឃុំខ្លួនចាប់តាំងពីការចាប់ខ្លួននាយកហិរញ្ញវត្ថុក្រុមហ៊ុនទូរគមនាគមន៍ចិន Huawei លោកស្រី ម៉េង វ៉ានចូវ (Meng Wanzhou) កាលពីខែធ្នូ កន្លងទៅក្នុងទីក្រុង វែនខូវើ (Vancouver) តាមសំណើរបស់ សហរដ្ឋអាមេរិក។ នេះបើតាមការចេញផ្សាយដោយសារព័ត៌មាន Channel News Asia នៅព្រឹកថ្ងៃសុក្រ ទី០៤ ខែមករា ឆ្នាំ២០១៩។
តាមរយៈសេចក្ដីថ្លែងការណ៍មួយ ចេញផ្សាយនៅថ្ងៃព្រហស្បតិ៍សប្ដាហ៍នេះ (ម៉ោងក្នុងទីក្រុងអូតាវ៉ា) រដ្ឋាភិបាលកាណាដាបានបញ្ជាក់ទៀតថា ក្នុង ចំណោមពលរដ្ឋកាណាដាទាំង ១៣នាក់ខាងលើក៏រួមមានលោក ម៉ៃឃើល កូវរីក (Michael Kovrig), លោក ម៉ៃឃើល ស្ប៉ាវ័រ (Michael Spavor) និងស្រ្តីម្នាក់ ឈ្មោះ សារ៉ាហ៍ ម៉ាកឡេវើ (Sarah McIver) ខណៈមានតែអ្នកទាំង ០៣នាក់នេះប៉ុណ្ណោះត្រូវបានបញ្ជាក់អត្តសញ្ញាណ។
ប៉ុន្តែមកទល់នឹងពេលនេះ មិនទាន់មានការបញ្ជាក់ពីបទល្មើសដែលជនជាតិកាណាដាឯទៀត (១០នាក់)បានប្រព្រឹត្តនៅលើទឹកចិននោះទេ ដោយគ្រាន់តែគេដឹងថា លោកស្រី McIver ដែលជាគ្រូ បង្រៀនមា្នក់ត្រូវបានដោះលែង និងត្រឡប់ទៅកាន់ប្រទេសកាណាដាវិញហើយកាលពីពេលថ្មីនេះ ដោយអាជ្ញាធរចិនបានអះអាងថា លោកស្រីបានស្នាក់នៅ និងធ្វើការខុសច្បាប់ក្នុងទឹកដីចិន ខណៈលោក Kovrig និងលោក Spavor នៅតែបន្តជាប់ឃុំនៅឡើយ។
គួរបញ្ជាក់ថា ភាពតានតឹងផ្នែកការទូតរវាងកាណាដា និងចិនបានផ្ទុះឡើងក្រោយលោកស្រី Meng Wanzhou ត្រូវបានអាជ្ញាធរកាណាដាចាប់ខ្លួនក្នុងទីក្រុង Vancouver តាមសំណើរបស់សហរដ្ឋអាមេរិកកាលពីថ្ងៃទី២ ខែធ្នូកន្លងទៅ ហើយលោកស្រី ត្រូវដោះ លែងនៅក្រៅឃុំក្រោមបា្រក់ធានា ៧.៤លានដុល្លារ។ ម្យ៉ាងវិញទៀត បើទោះជារដ្ឋាភិបាលកាណាដាបដិសេធថា ការចាប់ខ្លួនពលរដ្ឋរបស់ខ្លួន មិនមានជាប់ពាក់ព័ន្ធនឹងសំណុំរឿងលោកស្រី Meng ប៉ុន្តែការចាប់ខ្លួននេះកើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីចិនបានព្រមាន ចាត់វិធានការឆ្លើយតប បើសិនជាទីក្រុងអូតតាវ៉ា មិនព្រមដោះលែងនាយកហិរញ្ញវត្ថុរូបនេះឲ្យមានសេរីភាពដូចដើមទេនោះ៕
