(សិង្ហបុរី)៖ ក្រុមហ៊ុនផលិត​ចំណីអាហារ​សិង្ហបុរី IRVINS Salted Egg បានសម្ដែង​ការសោកស្ដាយ និងសូមទោស​យ៉ាងខ្លាំង​បន្ទាប់ពី អតិថិជន​ម្នាក់បានឃើញ​សត្វជីងចក់ងាប់​មួយក្បាល នៅក្នុងកញ្ចប់​នំស្បែកត្រី​បំពង។ នេះបើតាម​ការដកស្រង់ការផ្សាយពី​សារព័ត៌មាន Channel News Asia នៅរសៀលថ្ងៃព្រហស្បតិ៍ ទី០៣ ខែមករា ឆ្នាំ២០១៩។

នៅក្នុងសេចក្ដីថ្លែងការណ៍របស់ខ្លួន ចេញផ្សាយនៅ​ថ្ងៃពុធសប្ដាហ៍នេះ ក្រុមហ៊ុន IRVINS Salted Egg បានគូស​បញ្ជាក់យ៉ាងដូច្នេះថា «​យើងពិតជាមាន​អារម្មណ៍តក់ស្លុត នៅពេលដែល​បានលឺថា អតិថិជនរបស់យើង​បានរកឃើញ​ សត្វជីងចក់ងាប់មួយ​ក្បាល​នៅក្នុងកញ្ចប់នំ ... ហើយយើង​ពិតជាសោក​ស្ដាយ និងសូមទោស​ជាអនេកដល់​អតិថិជន និងអ្នកគ្រប់គ្នា​ដែលបានរងការប៉ះ​ទង្គិចដោយឧប្បទ្ទវហេតុ​នេះ ទាំងដោយ​ផ្ទាល់ និង​ប្រយោល»។

គួរបញ្ជាក់ថា ការសូមទោស​ខាងលើ​របស់ IRVINS Salted Egg ធ្វើឡើងបន្ទាប់​ពីអ្នកលេងបណ្ដាញ​ទំនាក់ទំនង​សង្គម Facebook ម្នាក់​ឈ្មោះ ចេន ហូលឡូវ៉េយ (Jane Holloway) បានបង្ហោះថា សមាជិកគ្រួសារ​របស់លោកស្រីបានប្រទះឃើញ​ សត្វជីងចក់​ងាប់មួយក្បាលនៅក្នុង​កញ្ចប់នំ។ ហេតុការណ៍​នេះ​ក៏បាន​ធ្វើឲ្យមាន​ចែកចាយ​តៗគ្នា នៅក្នុង​បណ្តាញសង្គម​សិង្ហបុរី និងតាមរយៈសារព័ត៌មាន​ធំៗផងដែរ៕