(អាហ្រ្វិកខាងត្បូង)៖ អតីតប្រធានាធិបតីអាហ្វ្រិកខាងត្បូងលោក ចាខូប ហ្ស៊ូម៉ា (Jacob Zuma) បានបង្កភាពចម្រូងចម្រាស់នយោបាយសាជាថ្មី បន្ទាប់ពីបានចុះហត្ថលេខាលើកិច្ចព្រមព្រៀង ចេញអាល់ប៊ុមចម្រៀងរបស់លោក។ នេះបើតាមការចេញផ្សាយដោយសារព័ត៌មាន BBC នៅរសៀលថ្ងៃព្រហស្បតិ៍ ទី០៣ ខែមករា ឆ្នាំ២០១៩។
ភាពចម្រាស់ចម្រូងមិនមែនកើតឡើងដោយសារគ្រាន់តែលោក Zuma ចេញអាល់ប៊ុមចម្រៀងនោះទេ ប៉ុន្តែអ្វីដែលសំខាន់គឺគណបក្សប្រឆាំងសម្ព័ន្ធប្រជាធិបតេយ្យ Democratic Alliance (DA) បានសម្ដែងការមិនសប្បាយចិត្តជាខ្លាំង ចំពោះអាជ្ញាធរនៅក្នុងតំបន់ អ៊ីធែកវីនី (eThekwini) សម្រាប់ការប្រើប្រាស់មូលនិធិរបស់រដ្ឋាភិបាល នៅក្នុងតំបន់គាំទ្រការចេញអាល់ប៊ុមចម្រៀងរបស់អតីតប្រធានាធិបតី អាហ្វ្រិកខាងត្បូងរូបនេះ ដោយពួកគេចាត់ទុកជា ការចំណាយធនធានខ្ជះខ្ជាយហើយថា ធនធាននេះគួរតែចំណាយទៅលើយុវជន ដែលកំពុងប្រឡូកក្នុងវិស័យសិល្បៈវាប្រសើរជាង។
គួរបញ្ជាក់ថា តំបន់ eThekwini ស្ថិតនៅក្នុងខេត្ត ក្វាហ្ស៊ូលីណាថាល់ (Kwa Zulu-Natal) ជាទីកន្លែងកំណើតរបស់លោក Jacob Zuma និងជាមូលដ្ឋានគាំទ្រដ៏សំខាន់របស់លោក។ លោក Zuma ត្រូវបានគណបក្សលោកផ្ទាល់បណ្ដេញចេញពីតំណែង ជាប្រធានាធិបតីអាហ្វ្រិកខាងត្បូងកាលពីខែកុម្ភៈ ឆ្នាំ២០១៨ ក្រោយរងការចោទប្រកាន់ជាបន្តបន្ទាប់ពីបទពុករលួយ ដែលលោកបានប្រព្រឹត្តនៅអំឡុងឆ្នាំ ១៩៩០ បើទោះជាលោកបដិសេធក៏ដោយ៕
