(អាមេរិក)៖ យានអវកាស New Horizon របស់អង្គការ NASA បានបញ្ជូនសញ្ញាទីមួយរបស់វាដោយជោគជ័យ មកកាន់ផែនដីនៅថ្ងៃអង្គារសប្តាហ៍នេះ ក្រោយពីវាបានទៅដល់វត្ថុមួយ ដែលស្ថិតនៅចុងប្រព័ន្ធព្រះអាទិត្យ។ នេះបើតាមការដកស្រង់ការផ្សាយចេញពីសារព័ត៌មាន CNBC នៅព្រឹកថ្ងៃពុធ ទី០២ ខែមករា ឆ្នាំ២០១៩។
យានអវកាស New Horizon ដែលដើរដោយថាមពលនុយក្លេអ៊ែរបានហោះហើរក្នុងទីអវកាសចម្ងាយ ៦.៤ពាន់លានគីឡូម៉ែត្រ ដើម្បីទៅដល់រយៈចម្ងាយ ៣,៥៤០គីឡូម៉ែត្រពីអាចម៍ផ្កាយរាងដូចសណ្តែកដីមានឈ្មោះថា Ultima Thule ដែលមានមុខកាត់ប្រវែង៣២គីឡូម៉ែត្រ នៅតំបន់ខ្សែក្រវាត់ខៃភើ (Kuiper Belt) ជាខ្សែក្រវាត់នៃក្រុមអាចម៍ផ្កាយទឹកកក នៅហួសពីគន្លងគោចរនៃភពណិបទូន និងភ្លុយតូទៅទៀត។
គួរជម្រាបថា បើតាម NASA យាន New Horizon នឹងបាញ់បញ្ជូនទិន្នន័យក៏ដូចជារូបភាពរបស់ Ultima Thule ជាបន្តបន្ទាប់នៅប៉ុន្មានថ្ងៃខាងមុខ។ យានអវកាសនេះ ត្រូវបានបង្ហោះឡើងទីអវកាសកាលពីខែមករា ឆ្នាំ២០០៦ ហើយមុនពេលទៅដល់អាចម៍ផ្កាយ Ultima Thule យាន New Horizon បានចំណាយពេលសិក្សាលើភពមិនពេញលក្ខណៈ «ភ្លុយតូ» និងព្រះច័ន្ទចំនួន ០៥របស់វា។ អាចម៍ផ្កាយ Ultima Thule ស្ថិតនៅចម្ងាយ ១.៦ពាន់លានគីឡូម៉ែត្រពីភ្លុយតូ។ បេសកកម្មនេះ គឺជាការជួបគ្នារវាងយាន និងវត្ថុអវកាសដែលនៅឆ្ងាយដាច់សង្វែងក្នុងប្រព័ន្ធព្រះអាទិត្យរបស់យើង៕
