(សេអ៊ូល)៖ ប្រមុខដឹកនាំកំពូលផុតលេខកូរ៉េខាងជើង លោក គីម ជុងអ៊ុន នៅក្នុងពិធីថ្លែងសារស្វាគមន៍ការចូលមកដល់នៃឆ្នាំសកល២០១៩នេះ បានបង្ហាញនូវជំហររបស់ទីក្រុងព្យុងយ៉ាងដដែល នោះគឺការរក្សាការប្តេជ្ញាលុបបំបាត់អាវុធនុយក្លេអ៊ែរចេញពីឧបទ្វីបកូរ៉េ ដែលប្រការនេះបាននាំឲ្យកូរ៉េខាងត្បូងសម្តែងការស្វាគមន៍ភ្លាមៗ។ នេះបើតាមការចេញផ្សាយដោយ សារព័ត៌មានស៊ីនហួរ នារសៀលថ្ងៃអង្គារ ទី០១ ខែមករា ឆ្នាំ២០១៩។
កាលពីយប់ថ្ងៃចន្ទនោះ ប្រជាជនកូរ៉េខាងជើងរ៉ាប់ម៉ឺននាក់ បានប្រមូលផ្តុំគ្នានៅឯទីលាន គីម អ៊ីលស៊ុង ដែលស្ថិតនៅកណ្តាលរដ្ឋធានីព្យុងយ៉ាង ដើម្បីត្រៀមស្វាគមន៍ការចូលមកដល់នៃឆ្នាំ២០១៩ ហើយក្នុងនោះក៏មានការសម្តែងសិល្បៈ ច្រៀងរាំកម្សាន្ត និងការបាញ់កាំជ្រួចអបអរផងដែរ។ នាឱកាសនោះលោក គីម ជុងអ៊ុន បានធ្វើពិធីថ្លែងសារមួយជូនប្រជាជាតិរបស់លោក និងអន្តរជាតិយ៉ាងដូច្នេះថា «ខ្ញុំតែងតែត្រៀមខ្លួនជានិច្ច ដើម្បីអង្គុយចុះម្តងទៀតជាមួយប្រធានាធិបតីអាមេរិក (លោក ដូណាល់ ត្រាំ) គ្រប់ពេលវេលា និងខិតខំប្រឹងប្រែងបង្កើតចេញនូវលទ្ធផលមួយ ដែលសហគមន៍អន្តរជាតិនឹងស្វាគមន៍»។
គួរបញ្ជាក់ថា សេចក្តីថ្លែងការណ៍ឆ្លងឆ្នាំខាងលើនេះ ត្រូវបានចាក់ផ្សាយនៅតាមកញ្ចក់ទូរទស្សន៍រដ្ឋរបស់កូរ៉េខាងជើង ដោយក្នុងនោះលោក គីម ក៏បានសង្កត់ធ្ងន់ផងដែរ អំពីចេតនារបស់កូរ៉េខាងជើងក្នុងការកសាងទំនាក់ទំនងថ្មីមួយជាមួយសហរដ្ឋអាមេរិក និងជាពិសេសនោះគឺការបន្តការប្តេជ្ញាចិត្តលុបបំបាត់អាវុធនុយក្លេអ៊ែរ ចេញពីតំបន់ឧបទ្វីបកូរ៉េ។ ជុំវិញសាររបស់កូរ៉េខាងជើងនេះដែរ ទីក្រុងសេអ៊ូលបានចេញមុខសម្តែងការរីករាយ និងស្វាគមន៍ ដោយអះអាងថា វានឹងបង្កើតសន្តិភាពជាអចិន្ត្រៃយ៍សម្រាប់ឧបទ្វីបកូរ៉េ៕
