(ញូយ៉ក)៖ រូបថតរបស់​បុរសជាជនជាតិ​អាមេរិកម្នាក់ ដែលពាក់ស្លាក​ស្វែងរក​អ្នកបរិច្ចាគ​ក្រលៀន​ឱ្យភរិយារបស់ខ្លួន កំពុងបង្កភាព​ភ្ញាក់ផ្អើល និងការអាណិតអាសូ​យ៉ាងខ្លាំង នៅលើបណ្ដាញ​ទំនាក់ទំនង​សង្គម ទូទាំងសហរដ្ឋអាមេរិក។ នេះបើតាម​ការចេញផ្សាយ​ដោយទីភ្នាក់ងារ​សារព័ត៌មាន​ចិនស៊ីនហួរ នៅល្ងាចថ្ងៃចន្ទ ទី៣១ ខែធ្នូ ឆ្នាំ២០១៨។

រូបថតជាច្រើន​សន្លឹកត្រូវបាន​គេថត នៅឯផ្សារទំនើប​មួយកន្លែង បានបង្ហាញពីបុរសម្នាក់​ពាក់ស្លាកដោយមានសរសេរពី​លើថា «ស្វែងរកអ្នកបរិច្ចាគគ្រលៀន មានឈាមគ្រុប B+» ឱ្យប្រពន្ធរបស់ខ្លួន​ជាមួយលេខទំនាក់​ទំនង​ផងដែរ។ ចំណែកឯ បណ្ដាញ​ទំនាក់ទំនង​សង្គមជា​ពិសេសគឺ Twitter បាននាំគ្នាចែករំលែក​រូបភាពបុរសនេះបន្ត ដោយសង្ឃឹម​ថា នឹងរកបានអ្នក​បរិច្ចាគ។

គួរបញ្ជាក់ថា បុរសខាងលើ​ត្រូវបានគេបញ្ជាក់​អត្តសញ្ញាណរួចហើយ ដោយលោកមាន​ឈ្មោះថា រ៉ាយម៉ុនដ៍ ថមសុន (Raymond Thompson) និងមានប្រពន្ធឈ្មោះ ម៉ាយឡេន (Mylen) ដែលកំពុងជំងឺក្រលៀន (តំរងនោម) អស់រយៈពេលជាង​ ២ឆ្នាំមកហើយ។ អ្នកទាំងពីរ​រស់នៅក្នុងសង្កាត់ ប្រ៊ូឃ្លីន (Brooklyn) នៃទីក្រុងញូយ៉ក ជាមួយកូនស្រី​ម្នាក់អាយុ ០៤ឆ្នាំ។ ដោយឡែក​បើតាម​សារព័ត៌មាន CNN មនុស្សមិន​ស្គាល់អត្តសញ្ញាណម្នាក់ ​បានយល់ព្រមបរិចា្ចគឱ្យ​គ្រលៀន Mylen ហើយ៕