(បារាំង)៖ យុវតី ធីឡាន ប្លង់ដូ (Thylane Blondeau) ដែល​ធ្លាប់ជាប់​ជាកុមារី​ស្អាត​ផ្តាច់​គេលើពិភពលោក​កាលពីរយៈពេល ១១ឆ្នាំកន្លងទៅនោះ មកដល់ឆ្នាំ២០១៨នេះ នាងនៅ​តែគ្រងតំណែង​ជានារីស្រស់ស្អាតបំផុតលើពិភពលោក​ដដែល ក្នុងនាមជា​តារាម៉ូដែល​ដែលមានវ័យទើបតែ ១៧ឆ្នាំ​ប៉ុណ្ណោះ។ នេះបើតាមការចេញ​ផ្សាយដោយសារព័ត៌មាន Sputnik នារសៀល​ថ្ងៃចន្ទ ទី៣១ ខែធ្នូ ឆ្នាំ២០១៨។

Thylane Blondeau បានក្លាយ​ជា​តារាម៉ូដែល ឲ្យអ្នកច្នៃម៉ូដបារាំងដ៏ល្បីល្បាញ​គឺលោក ហ្សង់ ផូល ហ្គូលទែ (Jean Paul Gaultier) តាំងតែពីនាង​ទើបមានវ័យ ០៤ឆ្នាំមកម្ល៉េះ ហើយក្រោយមក​ពេលនាងមានអាយុ ០៦ឆ្នាំ នាងបាន​ជាប់​ឈ្មោះជាក្មេងស្រី​​ម៉ូដែល ដែលមាន​សម្រស់ស្អាតជាងគេបំផុត​​នៅលើពិភពលោក "the most beautiful girl" តែម្តង។

ការប្រកួតប្រជែង​ជាថ្មី​ក្នុងការបិទបញ្ចប់​ទំព័រឆ្នាំ២០១៨ នេះ​ត្រូវបានធ្វើ​ឡើង​​ដោយ​គណនី Instagram ឈ្មោះ TC Candler ដែល​​មានអ្នក Follows រហូតដល់​​ទៅជាង ៦៦៤ពាន់នាក់។ នៅក្នុងនោះ​​វីដេអូដែល​​បង្ហាញពីសម្រស់​នារីទូទាំងពិភពលោក​​​ចំនួន ១០០នាក់​​ត្រូវបានបង្ហោះ ហើយត្រឹមតែ​រយៈពេលពីរ​ថ្ងៃ​ប៉ុណ្ណោះ វីដេអូរបស់​​យុវតី Thylane Blondeau មានអ្នកទស្សនា​​រហូតដល់ទៅ​ជាង ២លានដង ដែលនេះបង្ហាញថា នាងជាម្ចាស់ជ័យ​លាភី​ប្រចាំ​ឆ្នាំ២០១៨។

គួរបញ្ជាក់ថា ក្រោយពីបាន​គ្រងតំណែងនេះ​ជាថ្មី Thylane Blondeau បាន​បង្ហោះ​សារ​ថ្លែងអំណរគុណ​យ៉ាងជ្រាលជ្រៅ​ដល់បណ្តាអ្នក​គាំទ្ររបស់នាង ដោយក្នុងនោះ​នាងបាន​បញ្ជាក់ថា «ខ្ញុំមិនដែល​រំពឹងនឹងទទួលបានលេខ ១ បែបនេះឡើយ»។ ដោយ​ឡែក​ក្រុម​អ្នកគាំទ្រជា​ច្រើនបានសម្តែងការ​អបអរចំពោះ Thylane Blondeau និង​មួយ​ចំនួនបាន​លើឡើងថា «អ្នកពិត​ជាស្អាត... អ្នកសាកសមហើយ​ដែលទទួលបាន​តំណែងនេះ... យើង​ដឹងថា អ្នកឆ្លាត និងស្រស់​ស្អាត​បំផុត...»៕