(ប៉េកាំង)៖ ប្រធានាធិបតីចិន លោក ស៊ី ជិនពីង​ និងប្រធានាធិបតីអាមេរិក លោក ដូណាល់ ត្រាំ បានជួបពិភាក្សាគ្នាតាមទូរស័ព្ទ កាលពីថ្ងៃសៅរ៍ ដោយបង្ហាញពីចេតនារៀងៗខ្លួនក្នុងការជម្រុញឱ្យមានការអនុវត្តតាមកិច្ចព្រមព្រៀងដែលត្រូវបានធ្វើឡើងនៅ​អំឡុងកិច្ចប្រជុំកំពូល G20 ក្នុងប្រទេសអាហ្សង់ទីន កាលពីចុងខែវិច្ឆិកាកន្លងទៅ។ នេះបើតាមការចេញផ្សាយដោយសារព័ត៌មាន CGTN នៅថ្ងៃអាទិត្យ ទី៣០ ខែធ្នូ ឆ្នាំ២០១៨។

យោងតាម CGTN នៅក្នុងកិច្ចសន្ទនានោះ លោកត្រាំ បានឆ្លៀតជូនពរលោកស៊ី និងប្រជាជនចិននាឱកាសចូលឆ្នាំថ្មី ហើយលោក ក៏បានអះអាងដែរថាកិច្ចចរចាដោះស្រាយជម្លោះពាណិជ្ជកម្មរវាងមហាយក្សសេដ្ឋកិច្ចទាំងពីរ កំពុងដំណើរការទៅមុខយ៉ាងរលូន ប្រកបដោយភាពវិជ្ជមាន ខណៈលោករំពឹងថាក្រុមការងារអាមេរិកនិងចិន នឹងអនុវត្តតាមកិច្ចព្រមព្រៀងដែលបានធ្វើឡើងនៅអំឡុង​កិច្ចប្រជុំ G20 ក្នុងប្រទេសអាហ្សង់ទីន។

ដោយឡែក ជាការឆ្លើយតប លោក ស៊ី បាននិយាយថា ចិនមានបំណងធ្វើការងារជាមួយសហរដ្ឋអាមេរិក ដើម្បីរក្សាទំនាក់ទំនង និងកិច្ចសម្របសម្រួលនានា សំដៅដោះស្រាយបញ្ហាធំៗរបស់ពិភពលោក និងនៅក្នុងតំបន់ ឈរលើគោលការណ៍ផ្ដល់​ផលប្រយោជន៍ និងគោរពគ្នាទៅវិញទៅមក។

គួរបញ្ជាក់ថា នៅអំឡុងកិច្ចប្រជុំ G20 កាលពីចុងខែវិច្ឆិកា លោក ដូណាល់ ត្រាំ និងលោក ស៊ី ជិនពីង បានយល់ព្រមផ្អាកការធ្វើ សង្រ្គាមដំឡើងពន្ធដាក់គ្នារយៈពេល៩០ថ្ងៃ រាប់ចាប់ពីថ្ងៃទី០១ ខែធ្នូមក។ ប៉ុន្តែ អ្នកជំនាញខ្លះនៅតែសង្ស័យដដែលថាប្រទេសទាំង ពីរអាចនឹងចាត់វិធានការដំឡើងដាក់គ្នាឡើងវិញ ខណៈចិនកំពុងងាកទៅទិញសណ្ដែងសៀងពីប្រេស៊ីល៕