(គែរ)៖ កងកម្លាំងការពារសន្តិសុខអេហ្ស៊ីបបានផ្តាច់ជិវិត ជនសង្ស័យជាសមាជិកក្រុមសកម្មប្រយុទ្ធ​ចំនួន៤០នាក់ នៅ​​ក្នុង​តំបន់ Sinai ខាងជើង និងទីក្រុង Giza បន្ទាប់ពីមានករណីផ្ទុះគ្រាប់បែកបង្កៃត្រូវ​ចំរថយន្តក្រុង​ដឹកភ្ញៀវទេសចរវៀតណាម​​​ ​នៅក្បែរតំបន់ប្រាសាទពីរ៉ាមីតហ្គីហ្សា ដែលបានបង្កឲ្យមនុស្ស០៤នាក់ស្លាប់និងរបួសជាច្រើននាក់។ នេះបើតាមការដក​ស្រង់ការផ្សាយចេញពីសារព័ត៌មាន Channel News Asia នៅយប់ថ្ងៃសៅរ៍ ទី២៩ ខែធ្នូ ឆ្នាំ២០១៨។

បើតាមក្រសួងមហាផ្ទៃអេហ្ស៊ីប គឺពុំមានការបញ្ជាក់ច្បាស់ថា ជនសង្ស័យជាក្រុមសកម្មប្រយុទ្ធខាងលើ មានជាប់ពាក់ព័ន្ធ​ជាមួយករណីវាយប្រហារ​នៅ​ក្បែរតំបន់ប្រាសាទពីរ៉ាមីត ក្នុងក្រុង Giza កាលពីថ្ងៃសុក្រដែរឬក៏អត់ឡើយ គ្រាន់តែបានឲ្យ​ដឹងថា កងសន្តិសុខរបស់ខ្លួនបានកម្ចាត់​ជនសង្ស័យ៣០នាក់ ក្នុងទីតាំងលាក់ខ្លួនរបស់ពួកគេនៅទីក្រុង Giza ព្រមទាំង​១០នាក់ទៀតនៅតំបន់ Sinai ខាងជើង។

គួរជម្រាបថា ប្រតិបត្តិការខាងលើត្រូវបានធ្វើឡើង បន្ទាប់ពីអ្នកទេសចរវៀតណាម០៣នាក់ និងអ្នកនាំភ្ញៀវដើរកម្សាន្ត​ជា​ជន​ជាតិ​អេហ្ស៊ីបម្នាក់បានបាត់បង់អាយុជីវិត និងយ៉ាងតិច១០នាក់ទៀតបានរងរបួស នៅពេលគ្រាប់បែកបង្កៃតាម​ផ្លូវ​មួយ​គ្រាប់ បានផ្ទុះត្រូវរថយន្តក្រុងរបស់ពួកគេ នៅចម្ងាយជិត៤គីឡូម៉ែត្រពី​តំបន់ប្រាសាទពីរ៉ាមីត​ហ្គីហ្សាដ៏ល្បីល្បាញ​លើ​ពិភព​លោក​​នៃ​ប្រទេសអេហ្ស៊ីប។ ទន្ទឹមនឹងនេះ ក៏ពុំទាន់មានក្រុមណាមួយចេញមុខអះអាងថា ករណីវាយប្រហារខាងលើជា​ទង្វើរបស់ខ្លួនដែរ៕