(សេអ៊ូល)៖ ព័ត៌មានឯកជនរបស់ប្រជាជនកូរ៉េខាងជើងជិត ១,០០០នាក់ ដែលកំពុងរស់​នៅជ្រកកោនក្នុងប្រទេសកូរ៉េខាងត្បូង ត្រូវ បានក្រុម Hackers លួចយក បន្ទាប់ពីកុំព្យូទ័រមួយគ្រឿងប្រតិបត្តិការដោយទីភ្នាក់រដ្ឋត្រូវបានគេវាយប្រហារព័ត៌មានវិទ្យា (Hack)។ នេះបើតាមយ៉ុនហាប់ ដកស្រង់ដោយសារព័ត៌មាន Sputnik នៅ​ល្ងាចថ្ងៃសុក្រ ទី២៨ ខែធ្នូ ឆ្នាំ២០១៨។

ទីភ្នាក់ងារសារព័ត៌មាន​យ៉ុនហាប់ ផ្អែកប្រភព​ដែលខ្លួនទទួលបាន​ពីក្រសួងបង្រួបបង្រួមជាតិ​កូរ៉េខាងត្បូង បានឱ្យដឹង​ទៀតថា ក្រុម Hackers បានលួច​យកឈ្មោះ ថ្ងៃខែ​ឆ្នាំកំណើត និងអាសយដ្ឋាន​របស់ប្រជាជន​កូរ៉េខាងជើង ៩៩៧នាក់ ដែលកំពុងរស់​នៅក្នុង ប្រទេស​កូរ៉េខាងត្បូង តាមរយៈការវាយប្រហារ​ព័ត៌មានវិទ្យា​ដោយប្រើវីរុស​កុំព្យូទ័រ។ លើសពីនេះទៅទៀត ប្រភពដដែលក៏បាន​បញ្ជាក់ដែរថា កុំព្យូទ័រត្រូវ​បានគេ Hack នោះគឺកុំព្យូទ័រផ្ទាល់ខ្លួន​របស់បុគ្គលិករដ្ឋ​ម្នាក់ នៅឯ​មជ្ឈមណ្ឌល ហាណា (Hana) ស្ថិតនៅក្នុងខេត្ត Gyeongsang ខាងជើង។

គួរបញ្ជាក់ថា អាជ្ញាធរ​កូរ៉េខាងត្បូង មិនទាន់កំណត់​អត្តសញ្ញាណ Hackers នៅ​ឡើយទេ ប៉ុន្តែជារឿយៗ​កូរ៉េខាងជើង​តែងតែត្រូវ​បានគេ​ចោទប្រកាន់ថា ជាអ្នកនៅពីក្រោយការវាយប្រហារ​ព័ត៌មានវិទ្យា​របៀប​នេះ៕