(ទ្រីប៉ូលី)៖ ហេតុការណ៍បំផ្ទុះអត្តឃាត និងបាញ់ប្រហារគ្នា​នៅក្រសួងការបរទេសលីប៊ី បានបណ្តាលឲ្យមនុស្សយ៉ាងតិច ០៥នាក់​ស្លាប់​។ នេះបើតាម​ការដកស្រង់ការផ្សាយ​ចេញពី​សារព័ត៌មាន Aljazeera នៅល្ងាច​ថ្ងៃអង្គារ ទី២៥ ខែធ្នូ ឆ្នាំ២០១៨។

ក្នុងចំណោម​អ្នកបាត់បង់ជីវិត​ទាំង ០៥នាក់ រួមមានមន្រ្តី​សន្តិសុខម្នាក់ និងបុគ្គលិក​របស់ក្រសួងម្នាក់ រីឯ០៣នាក់ទៀត​​គឺជា​​​ខ្មាន់កាំភ្លើង ដោយម្នាក់ត្រូវ​កងសន្តិសុខបាញ់​សម្លាប់ និង​​ ០២នាក់​បានបំផ្ទុះគ្រាប់បែកធ្វើអត្តឃាត​ខ្លួនឯង។ បើតាមការបញ្ជាក់​ពី​ក្រសួង​សុខាភិបាល​លីប៊ី មនុស្សយ៉ាងហោច​ណាស់ចំនួន ០៩នាក់ ក៏បានរង​របួសផងដែរ ខណៈរដ្ឋមន្រ្តី​ការបរទេសលីប៊ីលោក ម៉ូហាម៉េដ អាល់តាហឺ (Mohamed al-Taher) ពុំមានវត្តមាន​នៅទីនោះ​ក្នុងពេលកើត​ហើយឡើយ។ សម្រាប់ក្រុមនៅ​ពីក្រោយករណីនេះ ត្រូវគេ​ដាក់​ការសង្ស័យទៅ​លើ​​ក្រុម​បណ្តាញភេរវករ ISIS។

គួរជម្រាបថា ប្រទេសលីប៊ី​ត្រូវបានហែកហួរដោយ​សារតែការដណ្តើម​អំណាចគ្នា ព្រមទាំងភាព​អសន្តិសុខជា​បន្តបន្ទាប់ ដែលកើតមាន​ចាប់តាំងពីការទម្លាក់ចេញ​ពីអំណាច និងធ្វើឃាត​អតីត​មេដឹកនាំ លោក មួអាមម៉ា ហ្គាដាហ្វី (Muammar Gaddafi) កាលពី​ឆ្នាំ​២០១១។ បច្ចុប្បន្នលីប៊ី មានរដ្ឋបាល​គ្រប់គ្រងដែលប្រឆាំងគ្នា​យ៉ាងតិចពីរ គឺមួយស្ថិតនៅ​រដ្ឋធានីទ្រីប៉ូលី​ ដែលមានការ​ទទួល​ស្គាល់ដោយអង្គការ​សហប្រជាជាតិ និងមួយទៀតមាន​មូលដ្ឋាននៅ​ទីក្រុង តូប្រ៊ូក (Tobruk) ភាគខាងកើតប្រទេស។ ក្រៅពី​នេះ ក៏មានវត្តមានក្រុម​សកម្មប្រយុទ្ធជាច្រើន​ផ្សេងទៀត​ផងដែរ៕ ​