(ហ្សាការតា)៖ មនុស្សយ៉ាងតិចកើនដល់៦២នាក់​ហើយបានបាត់បង់ជីវិត ក្រោយ​មានករណីរលកយក្សស៊ូណាមិ វាយ​លុក​​​យ៉ាងកក្រើក​នៅ​តាម​តំបន់ឆ្នេរនៃ​ច្រក​សមុទ្រ​ Sunda ប្រទេសឥណ្ឌូណេស៊ី។ នេះ​បើ​តាម​ការ​ដក​ស្រង់ការ​ផ្សាយ​ចេញ​ពី​សារ​ព័ត៌មាន Associated Press (AP) នៅព្រឹកថ្ងៃអាទិត្យ​ ទី២៣ ខែធ្នូ ឆ្នាំ២០១៨។

បើតាមអាជ្ញាធរឥណ្ឌូណេស៊ី ​មនុស្ស​ប្រមាណ២០នាក់ បានបាត់ខ្លួន និងខ្ទង់៦០០នាក់បានរងរបួស ហើយ​អគារ​រាប់​រយ​ខ្នង​ក៏​បាន​រង​ការ​ខូច​ខាត​ផង​ដែរ ក្រោយ​ការវាយប្រហារ​​ពី​រលកយក្សកាលពី​វេលាយប់ថ្ងៃសៅរ៍។ ទីភ្នាក់ងារ​គ្រប់​គ្រង​គ្រោះ​​មហន្ត​រាយ​ឥណ្ឌូ​ណេស៊ី បានឲ្យ​ដឹង​ថា មូលហេតុមួយដែលអាចបង្ក​ឲ្យ​មានរលកស៊ូណាមិបែបនេះ អាចមកពីបាតុភូត​បំណាក់​ដី​នៅ​បាតសមុទ្រ បន្ទាប់​ពី​ភ្នំ​ភ្លើង Anak Krakatoa បានផ្ទុះឡើង។

គួរជម្រាបថា ច្រកសមុទ្រ Sunda ស្ថិតនៅចន្លោះប្រជុំកោះជ្វានិងស៊ូម៉ាត្រា ដែលតភ្ជាប់សមុទ្រជ្វាឥណ្ឌូណេស៊ី ទៅកាន់​មហាសមុទ្រឥណ្ឌា។ សម្រាប់តំបន់ដែលរងការវាយលុកពីស៊ូណាមិ ត្រូវគេរាយការណ៍ថា រួមមានតំបន់ Pandeglang, Lampung ខាងត្បូង និង Serang។ អាជ្ញាធរឥណ្ឌូណេស៊ី ក៏បានព្រមានផងដែរថា តួលេខមនុស្សស្លាប់និងរបួស​អាច​មាន​ការកើនឡើងជាបន្តបន្ទាប់ទៀត៕