(ពិភពលោក)៖ នៅថ្ងៃពុធ ទី១៩ ខែធ្នូ ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖

១៖ ទីបំផុតក្រសួងការបរទេស​អាមេរិក បានអនុម័ត​ហើយលើ​ការលក់ប្រព័ន្ធ​មីស៊ីលការពារ​ដែនអាកាស Patriot មាន​តម្លៃ ជាង ៣.៥ពាន់លានដុល្លារ ឱ្យតួកគី ក្នុងចេតនាមួយ​ដែលគេមើលឃើញ​ថា ជាការបញ្ចុះបញ្ចូល​ទីក្រុងអង់ការ៉ា​លុបចោល​គម្រោង​ទិញប្រព័ន្ធ​មីស៊ីល S-400 ពីរុស្ស៊ី៕

២៖ អនុរដ្ឋមន្ត្រី​ការបរទេស​រុស្ស៊ី​លោក ស៊ឺហ្គៃ រីបាបកូវ (Sergey Ryabkov) បាននិយាយថា សហរដ្ឋអាមេរិក​បានទទួលស្គាល់​ចំពោះ​សម្រេចចិត្តដកខ្លួនចេញ​ពីសន្ធិសញ្ញាកំណត់អានុភាពអាវុធមីស៊ីល-នុយក្លេអ៊ែរ រយៈចំងាយមធ្យម និងជិត ឬ INF បានដល់​ទីបញ្ចប់ហើយ។ ប៉ុន្តែ​ទន្ទឹមគ្នាលោកក៏បាន​ព្រមានដែរថា ទីក្រុងម៉ូស្គូនឹង​ចាត់វិធានការ​ឆ្លើយតប បើមីស៊ីល​អាមេរិកត្រូវបានដំឡើង​នៅលើទឹកដី​អឺរ៉ុប៕

៣៖ ជនអន្តោប្រវេសន៍​ហុងឌូរ៉ាស់ច្រើនជាង ៧,២០០នាក់ ដែលកំពុងព្យាយាមចូលមកកាន់សហរដ្ឋអាមរិក ក្នុងចំណោម​ជនអន្តោប្រវេសន៍មកពី​បណ្ដាប្រទេស​អាមេរិកកណ្ដាល បានស្ម័គ្រចិត្ត​ត្រឡប់ទៅកាន់ប្រទេសកំណើត​របស់ពួកគេ​វិញហើយ៕

៤៖ យោធាជើងទឹកអាមេរិក កំពុងធ្វើពិចារណាថា តើគួឬមិនគួរបញ្ជូនយន្តហោះ​ប្រឆាំងនាវាមុជទឹក​ធុន P-8 Poseidon ទៅកាន់មូលដ្ឋាននៅឯរដ្ឋអាឡាស្កា ក្រោមកិច្ចប្រឹងប្រែងតាមឃ្លាំមើលឲ្យបានដិតដល់ លើសកម្មភាព​របស់​ចិននិងរុស្ស៊ី​នៅតំបន់ទឹកកកអាក់ទិក៕

៥៖ មន្រ្តីបេសកជនពិសេសទទួលបន្ទុកកិច្ចការកូរ៉េខាងជើង​នៃសហរដ្ឋអាមេរិក នារសៀលថ្ងៃពុធនេះ​បានធ្វើដំណើរទៅដល់​ប្រទេសកូរ៉េខាងត្បូង ខណៈដែល​ទីក្រុងវ៉ាស៊ីនតោននិងទីក្រុងព្យុងយ៉ាង កំពុងប្រឈមបញ្ហាលំបាក​ក្នុងការទម្លុះរកច្រកចេញពី​ភាពជាប់គាំងនៃកិច្ចចរចារវាងប្រទេសទាំងពីរ ដែលសំដៅបញ្ចប់កម្មវិធី​អាវុធនុយក្លេអ៊ែរ​នៃ​ប្រទេសកូរ៉េខាងជើង៕

៦៖ ការិយាល័យសុវត្ថិភាព​ដឹកជញ្ជូន​អូស្ត្រាលី (ATSB) បានបើកការ​ស៊ើបអង្កេតមួយ លើក្រុមហ៊ុន​អាកាសចរណ៍ Virgin Australia Airline ជុំវិញឧប្បទ្ទវហេតុ​ដ៏ធ្ងន់ធ្ងរមួយ នៅ​អាកាសយានដ្ឋានទីក្រុង​កង់បេរ៉ា៕