(វ៉ាស៊ីនតោន)៖ ក្រុមតារាវិទូទើបតែបាន​ប្រកាសដំណឹងដ៏គួរឲ្យភ្ញាក់​ផ្អើលធំមួយ នាដើមសប្តាហ៍​នេះ ដោយវត្ថុអវកាស​ថ្មីមួយត្រូវបានដាក់​ឈ្មោះថា 2018 VG18 ត្រូវបានរកឃើញ​នៅក្នុង​ប្រព័ន្ធព្រះអាទិត្យ​របស់យើងនេះ ហើយក៏ត្រូវចាត់ទុកជាវត្ថុអវកាសពណ៌ផ្កាឈូក មានរហស្សនាមថា «Farout» ផងដែរ។ នេះបើតាមការចេញផ្សាយដោយ ស៊ីនហួរ នាថ្ងៃអង្គារ ទី១៨ ខែធ្នូ ឆ្នាំ២០១៨។

របកគំហើញ​ខាងលើនេះ ត្រូវបានប្រកាសចេញ​ដោយសហគមន៍​តារាវិទូ និងវិទ្យាសាស្ត្រភព IAUMPC ដែលចម្ងាយរបស់​វាពីព្រះអាទិត្យ គឺស្មើនឹងគម្លាត​ពីព្រះអាទិត្យ និងផែនដី​គុណនឹង ១២០ដង (១៥០គីឡូម៉ែត្រ X ១២០) ឬក៏ជិត ២០ពាន់លាន​គីឡូម៉ែត្រ ដែលឆ្ងាយជាង​ចម្ងាយ​រវាង​ព្រះអាទិត្យ និងភពភ្លុយតូ​គុណនឹង ២ ទៅទៀត។ តាមពិតវត្ថុ​អវកាសថ្មីនេះ ត្រូវបានរកឃើញ​​អំឡុងពេលនៃបេសកកម្ម​ស្វែងរកភពទី ៩ ឬ Planet X ដែលជាភព​យក្សមួយ ត្រូវបាន​ក្រុម​តារាវិទូមួយ​ចំនួនជឿជាក់ កំពុងលាក់ខ្លួន​ក្នុងប្រព័ន្ធរបស់យើង។

សម្រាប់ភព​បម្រុងដែលត្រូវបានចាត់​ទុកថា ជាវត្ថុអវកាសឆ្ងាយជាង​គេបំផុត​នៅក្នុង​ប្រព័ន្ធ​ព្រះអាទិត្យនោះ គឺ Eris ហើយវាមានទំហំប្រហាក់​ប្រហែលនឹងភពភ្លុយតូផងដែរ ជាមួយនឹង​មុខកាត់ ២,៣២៦គីឡូម៉ែត្រ ចំណែកឯភ្លុយតូវិញគឺ ២,៣៧៧គីឡូម៉ែត្រ។ ដោយឡែក​​សម្រាប់ Farout ដែលទើបត្រូវបានរកឃើញនេះ គឺមាន​​មុខកាត់ ៥០០គីឡូម៉ែត្រ​ប៉ុណ្ណោះ គឺតូចជាង​ព្រះច័ន្ទ Charon របស់ភពភ្លុយតូច​រហូតដល់ទៅជាង ២ដង ហើយវាបានក្លាយជាវត្ថុអវកាសឆ្ងាយ​បំផុតថ្មី ជំនួសឲ្យ Eris ចាប់ពីពេល​នេះតទៅ។

ជុំវិញលទ្ធផលដែលកំពុង​ធ្វើឲ្យពិភពលោកភ្ញាក់​ផ្អើលខាងលើនេះ លោក Sheppard ជាតារាវិទូមួយរូប​ ដែលឈានដល់បង្កើត​របកគំហើញថ្មីនេះបានបញ្ជាក់ថា «ខ្ញុំស្រាប់តែ​និយាយចេញ​នូវពាល្យថា Farout នៅពេលដែល​ខ្ញុំអង្កេតឃើញវត្ថុនោះ​ដំបូង ពីព្រោះ​នៅសុខៗស្រាប់តែខ្ញុំ​ឃើញវា កំពុងចល័ត​យឺតនៅទីនោះ... វាជាវត្ថុ​អវកាស ដែលពិត​​ជាកំពុង​គោចរនៅទីនោះ​ពិតមែន....»។

គួរបញ្ជាក់ថា បើតាមគន្លង និងចម្ងាយរបស់ Farout ក្រុមតារាវិទូ​អាចគណនាដឹងថា វាត្រូវការ​ពេល ១,០០០ឆ្នាំ ទើបអាចគោចរ​មួយជុំព្រះអាទិត្យ ឬស្មើនឹងមួយឆ្នាំ​របស់វាផ្ទាល់។ Farout ត្រូវបានចាប់​សញ្ញាឃើញដំបូងដោយ​តារាវិទូ Sheppard ជាមួយក្រុម​ការងាររបស់​លោក ដោយប្រើតេឡេស្កូប​ដ៏មានឥទ្ធិពល មានមូលដ្ឋាន​ក្នុងរដ្ឋហាវ៉ៃ នាកណ្តាល​មហាសមុទ្រប៉ាស៊ីហ្វិក ខណៈការ​បញ្ជាក់ថា ពិតជាមាន​វត្តមាន Farout ប្រាកដមែននោះ គឺតេឡេស្កូប​នៅ​ក្នុង​ប្រទេសឈីលី គឺជាសរុបសេចក្តី៕