(ឡុងដ៍)៖ សារព័ត៌មាន Telegraph បានរាយការណ៍ថា អគ្គព្រះរាជអាជ្ញាអង់គ្លេស​លោក ជីអូហ្វហ្វ្រេយ ខូក (Geoffrey Cox) បានអំពាវនាវ​ឱ្យមានការដក​នាយករដ្ឋមន្ត្រី​អង់គ្លេសបច្ចុប្បន្ន គឺលោកស្រី ថេរ៉េសា ម៉ាយ (Theresa May)​ ចេញពីតំណែង​ដើម្បីត្រួសត្រាយផ្លូវចរចា​ជាថ្មីឡើងវិញ ជាមួយសហភាព​អឺរ៉ុបស្ដី​ពី Brexit​។ នេះបើតាមការចេញផ្សាយដោយសារព័ត៌មាន Sputnik នៅល្ងាចថ្ងៃចន្ទ ទី១៧ ខែធ្នូ ឆ្នាំ២០១៨។

Telegraph ធ្វើ​សេចក្ដីរាយការណ៍​បែបនេះ ដោយផ្អែកលើការ​ស្រង់សម្ដីរបស់​លោក Cox នៅអំឡុងកិច្ច​ពិភាក្សា ជាមួយ​រដ្ឋមន្ត្រីខុទ្ទកាល័យ​ជាច្រើនរូបរបស់លោកស្រី May​ នាពេល​ថ្មីនេះ។ លើសពីនេះ​ទៅទៀត នាឱកាសនោះ​លោក Cox ក៏បានគូស​បញ្ជាក់ដែរថា លោកស្រីនាយករដ្ឋ​មន្ត្រីគួរតែត្រូវបានដក​ចេញពី​តំណែង នៅបន្ទាប់ពីត្រីមាស​ទី ១ (ខែមេសា) ឆ្នាំ២០១៩ ដើម្បីអនុញ្ញាតឲ្យមានការចាត់វិធានការ​បន្ត​បន្ទាប់នៃកិច្ច​ចរចាស្ដី​ពី Brexit។

គួរបញ្ជាក់ថា ក្រោយមាន​សេចក្ដីរាយការណ៍​របស់ Telegraph អ្នកនាំពាក្យ​លោក Cox បានបដិសេធថា លោកអគ្គរដ្ឋអាជ្ញាមិនបាន​និយាយដូចការ​លើកឡើង របស់សារព័ត៌មាន​អង់គ្លេសមួយនេះ​ឡើយ៕