យន្តហោះទម្លាក់គ្រាប់បែករុស្ស៊ីមកដល់ស្រុកកំណើតវិញ ក្រោយបញ្ចប់បេសកកម្មនៅវេណេស៊ុយអេឡា
15-12-2018 21:04
(ម៉ូស្គូ)៖ ទីបំផុតយន្តហោះទម្លាក់គ្រាប់បែករុស្ស៊ីពីរគ្រឿង ដែលបញ្ជូនទៅកាន់វេណេស៊ុយអេឡាកាលពីដើមសប្តាហ៍នេះ បានវិលត្រឡប់មកដល់ដែនដីនៃប្រទេសរុស្ស៊ីវិញហើយ។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅល្ងាចថ្ងៃសៅរ៍ ទី១៥ ខែធ្នូ ឆ្នាំ២០១៨។
ក្នុងឱកាសនោះក្រសួងការពារជាតិរុស្ស៊ី ក៏បានបញ្ចេញឃ្លីបវីដេអូបង្ហាញពីសកម្មភាពទទួលស្វាគមន៍យន្តហោះទម្លាក់ធុន Tu-160 ទាំងពីរគ្រឿងផងដែរ។ កាលពីអំឡុងពេលស្ថិតនៅវេណេស៊ុយអេឡា យន្តហោះរុស្ស៊ី Tu-160 បានធ្វើកោះហើរនៅលើសមុទ្រការីបៀន និងចូលរួមលំហាត់យោធាមួយចំនួននៅតំបន់អេក្វាទ័រ រួមមានទាំងការហោះហើររួមគ្នាជាមួយក្បួនយន្តហោះចម្បាំងរបស់កងទ័ពអាកាសវេណេស៊ុយអេឡាជាដើម។
គួរជម្រាបថា ការចល័តយន្តហោះខាងលើទៅកាន់វេណេស៊ុយអេឡា បានបណ្តាលឲ្យមានការរិះធ្ងន់ភ្លាមៗ ពីសំណាក់រដ្ឋាភិបាលអាមេរិក និងប្រទេសកូឡុំប៊ី ខណៈរដ្ឋាភិបាលទីក្រុងម៉ូស្គូបានបញ្ជាក់អះអាងថា ការហោះហើរនេះត្រូវបានធ្វើឡើងដោយស្របទៅតាមច្បាប់អន្តរជាតិ៕
