(ម៉ូស្គូ)៖ វិមានក្រឹមឡាំងបានប្រតិកម្មបកទៅវិញភ្លាមៗ បន្ទាប់ពីរដ្ឋមន្រ្តីការបរទេសអាមេរិក លោក ម៉ៃក៍ ប៉ុមប៉េអូ (Mike Pompeo) បានថ្លែងរិះគន់រដ្ឋាភិបាលរុស្ស៉ី ចំពោះការបញ្ជូនយន្តហោះទម្លាក់គ្រាប់បែក ០២គ្រឿងឆ្លងមហាសមុទ្រ និងសមុទ្របីបួនទៀតទៅកាន់វេណេស៊ុយអេឡា។ នេះបើតាមការដកស្រង់ការផ្សាយចេញពីវែបសាយ Bloomberg នៅល្ងាចថ្ងៃអង្គារ ទី១១ ខែធ្នូ ឆ្នាំ២០១៨។
នាថ្ងៃចន្ទសប្តាហ៍នេះលោក Pompeo បានបង្ហោះសារលើបណ្តាញសង្គម Twitter យ៉ាងដូច្នេះថា «ប្រជាជនរុស្ស៊ី និងវេណេស៊ុយអេឡា គួរតែស្វែងយល់ឲ្យច្បាស់ពីទិដ្ឋភាពជាក់ស្តែងនៃសកម្មភាពនេះ គឺរដ្ឋាភិបាលពីរដែលពុករលួយ កំពុងខ្ជះខ្ជាយថវិការដ្ឋព្រមទាំងគាបសង្កត់សិទ្ធិសេរីភាព ស្របពេលដែលប្រជាពលរដ្ឋរបស់ខ្លួនកំពុងរងទុក្ខ»។ ដោយមិនបង្អង់យូរ វិមានក្រឹមឡាំងបានចេញមុខថ្កោលទោសសេចក្តីថ្លែងការណ៍លើបណ្តាញសង្គមរបស់លោក Pompeo ថាជារឿងមិនសមរម្យនិងគ្មានលក្ខណៈការទូតទាល់តែសោះ។
គួរជម្រាបថា បើការបញ្ជាក់ក្រសួងការពារជាតិរុស្ស៉ី យន្តហោះទម្លាក់គ្រាប់បែករុស្ស៊ី ០២គ្រឿង បានចុះចតនៅអាកាសយានដ្ឋានអន្តរជាតិនៃទីក្រុង ម៉ៃក្វេធា (Maiquetia) ក្បែររដ្ឋធានីការ៉ាកាស់ បន្ទាប់ពីប្រធានាធិបតីវេណេស៊ុយអេឡាលោក នីកូឡាស់ ម៉ាឌូរ៉ូ បានបង្ហាញជំនឿជឿជាក់ខ្ពស់ថា សហរដ្ឋអាមេរិកកំពុងរៀបចំផែនការ ធ្វើរដ្ឋប្រហារទម្លាក់រដ្ឋាភិបាលរបស់លោក។
ការចល័តយន្តហោះទម្លាក់គ្រាប់បែករុស្ស៊ី Tu-160 ទៅកាន់វេណេស៊ុយអេឡាពុំមែនជាលើកទីមួយឡើយ ដោយយន្តហោះនេះក៏ធ្លាប់បានទៅដល់ទឹកដីប្រទេសវេណេស៊ុយអេឡា នៅខែកញ្ញា ឆ្នាំ២០០៨ និងខែតុលា-វិច្ឆិកា ឆ្នាំ២០១៣ ផងដែរ៕
