(ប៉ារីស)៖ បាតុកកម្មរបស់ក្រុមបាតុករអាវកាក់ពណ៌លឿងកាន់តែរីកធំឡើង បន្ទាប់ពីបាតុកម្មដ៏ហិង្សាត្រូវបានធ្វើឡើងជាថ្មី ក្នុងសប្តាហ៍ទី៤ កាលពីថ្ងៃសៅរ៍កន្លងទៅដើម្បីប្រឆាំងនឹងជំទាស់ នឹងកំណែទម្រង់របស់រដ្ឋាភិបាលប្រធានាធិបតីបារាំង លោក ម៉ាក្រុង។ ប៉ុន្តែព្រមពេលជាមួយ មន្ត្រីបារាំងខ្លះប្រកាន់ត្រង់ៗថា ក្រុមជ្រុលនិយមនៅក្នុងប្រទេសបារាំងចង់ប្រើប្រាស់ ក្រុមបាតុករអាវកាក់ពណ៌លឿងដើម្បីផ្ដួលរំលំរដ្ឋាភិបាលស្របច្បាប់ទីក្រុងប៉ារីស ដែលទើបតែប្រាប់ឱ្យប្រធានាធិបតីអាមេរិក លោក ដូណាល់ ត្រាំ បញ្ឈប់ជាបន្ទាន់ការលូកដៃចូលកិច្ចការផ្ទៃក្នុងរបស់បារាំង។
ក្រសួងមហាផ្ទៃបារាំង បានបញ្ជាក់ឲ្យដឹងកាលពីថ្ងៃអាទិត្យថា មានមនុស្សសរុបរហូតដល់ចំនួន១,៧២៣នាក់ត្រូវបានចាប់ ខ្លួនទូទាំងប្រទេសពាក់ព័ន្ធការធ្វើបាតុកម្មនេះ។ មិនតែប៉ុណ្ណោះ ប៉ូលិសបារាំងក៏បានប្រើប្រាស់ឧស្ម័នបង្ហូរទឹកភ្នែកដើម្បី បង្រ្កាបហ្វូងបាតុករផងដែរ ស្របពេលមនុស្ស០៤នាក់ហើយបានស្លាប់។
បាតុកម្មតវ៉ាប្រឆាំងនឹងឥន្ធនៈឡើងថ្លៃ ក្នុងនោះរួមមានទាំងប្រេង និងម៉ាស៊ូត បានកើតឡើងតាំងតែថ្ងៃទី១៧ ខែវិច្ឆិកាមកម្លេះ ។ ដោយឡែក កាលពីថ្ងៃសៅរ៍ចុងសប្ដាហ៍កន្លងទៅនេះ អាជ្ញាធរបារាំងបានបិទតំបន់ទេសចរណ៍ និងហាងទំនិញជាច្រើននៅក្នុងទីក្រុងប៉ារីស ជាមួយការដាក់ពង្រាយកងកម្លាំងសន្តិសុខរាប់ពាន់នាក់។ Eiffel Tower និងតំបន់ ទេសចរណ៍សំខាន់ៗនៅក្នុងទីក្រុងប៉ារីស ត្រូវបានបិទជាបណ្ដោះអាសន្ន ហើយហាងលក់ទំនិញនៅជាប់ដងផ្លូវមួយចំនួនត្រូវបិទទ្វារដើម្បីបញ្ចៀស ការលួច ឬប្លន់ក្នុងករណីមានភាពចលាចលណាមួយកើតឡើង។ បន្ថែមពីលើនេះដើម្បីរក្សាសន្តិសុខ និងសណ្ដាប់ធ្នាប់ ប៉ូលិស ៨៩,០០០នាក់ ត្រូវបានដាក់ពង្រាយ ខណៈ៨,០០០នាក់ផ្សេងទៀត ត្រូវបានដាក់ពង្រាយក្នុងទីក្រុងប៉ារីស។
តើបាតុកម្មក្នុងប្រទេសបារាំង អាចក្លាយជាបដិវត្តន៍ពណ៌ដែរឬទេ?
បើទោះជាមិនមានការសន្និដ្ឋានច្បាស់លាស់ណាមួយថា ភាពចលាចលបច្ចុប្បន្ន អាចនឹងប្រែទៅជាបដិវត្តន៍ពណ៌ដូចជា នៅ ស៊ីរី ឬលីប៊ីក៏ដោយ។ ក៏ប៉ុន្តែការភ័យខ្លាច និងការព្រួយបារម្ភបានកើនឡើងយ៉ាងខ្លាំងប្រទេសបារាំង ជាពិសេសគឺទីក្រុងប៉ារីស ជាទីដែលអំពើហិង្សាបានផ្ទុះឡើងរវាងក្រុមបាតុករ និងកងកម្លាំងសន្តិសុខ។ ជាក់ស្ដែងសូម្បីតែ អ្នកនាំពាក្យរដ្ឋាភិបាលបារាំង លោក Benjamin Griveaux ក៏បានអះអាងកាលពីថ្ងៃសុក្រថា ក្រុមជ្រុលនិយមនៅក្នុងប្រទេសបារាំង ចង់ប្រើប្រាស់ក្រុម បាតុករអាវកាក់ពណ៌លឿង ដើម្បីផ្ដួលរំលំរដ្ឋាភិបាលបារាំង។
លើសពីនេះទៅទៀត ប្រភពមិនបញ្ជាក់អត្តសញ្ញាណមកពីការិយាល័យប្រធានាធិបតីលោក ម៉ាក្រុង ថែមទាំងបានប្រាប់ សារព័ត៌មានបារាំង Le Figaro ដោយហៅ ក្រុមបាតុករអាវកាក់ពណ៌ថា ជាពួកបដិវត្តន៍។ «ពួកគេគឺជាពួកបដិវត្តន៍ ហើយ យើងកំពុងឃើញការព្យាយាមរបស់ពួកបដិវត្តន៍»។ នេះបើតាមប្រភពដដែលប្រាប់ Le Figaro ជាមួយការបញ្ជាក់បន្ថែមថា ទីភ្នាក់ងារស៊ើបការណ៍សំងាត់បារាំងបានព្រមានយោធា និងប៉ូលិស ឱ្យមានការប្រុងប្រយ័ត្នខ្ពស់ពាក់ព័ន្ធនឹងការប៉ុនប៉ងសម្លាប់ ឬប្រើប្រាស់អាវុធប្រឆាំងនឹងសមាជិកសភាបារាំង។
ជំងឺឆ្លងពាក់អាវកាក់ពណ៌លឿងនឹងរីកសាយនៅទ្វីបអឺរ៉ុប?
មិនថាតែនៅបារាំងនោះទេ ដែលកំពុងព្រួយបារម្ភចំពោះការរីកសាយនៃបាតុកម្មតវ៉ាដ៏ហិង្សារបស់ក្រុមបាតុករអាវកាក់ពណ៌ លឿង។ ពោលគឺសូម្បីតែបណ្ដាប្រទេសអឺរ៉ុបមួយចំនួនក៏កំពុងខ្វាយខ្វល់ដែរ ដោយពួកគេខ្លាចក្រែងប្រជាជនរបស់ខ្លួនយក គំរូតាមបាតុកម្មតវ៉ាដ៏ហិង្សានេះដើម្បីទាមទារ ឬសម្ដែងការមិនពេញចិត្តចំពោះរដ្ឋាភិបាល។ ប៉ុន្តែ ការយកគំរូតាម ក្រុមបាតុករអាវកាក់ពណ៌លឿង ត្រូវបានគេមើលឃើញចាប់ផ្ដើមរីកសាយជាបណ្ដើរៗហើយ ជាឧទារហណ៍គឺនៅក្នុងប្រទេស ម៉ងតេណេក្រូតែម្ដង។
យោងតាមសារព័ត៌មានបារាំង AFP កាលពីថ្ងៃអាទិត្យកន្លងទៅ នៅក្នុងប្រទេសម៉ុងតេណេក្រូ គឺក្រុមបាតុករមានទំនោរទៅ រករុស្ស៊ីរាប់រយនាក់បាននាំគ្នាពាក់អាវកាក់ពណ៌លឿង ដើម្បីតវ៉ាជំទាស់នឹងពាក្យបណ្ដឹងរបស់អាជ្ញាធរ ប្រឆាំងនឹងមេដឹកនាំពីររូបរបស់ពួកគេ។ ថ្លែងនៅក្នុងចំណោមហ្វូងបាតុករម៉ុងតេណេក្រូ មេដឹកនាំម្នាក់នៃក្រុមបាតុករ លោក អានឌ្រីចា មែនឌីក (Andrija Mandic) បានលើកឡើងយ៉ាងដូច្នេះថា «យើងចង់ធ្វើឱ្យប្រទេសរបស់យើង មានភាពប្រសើរឡើងដូចជាបារាំង ជាទីដែលបាតុកម្មតវ៉ាបានរារាំងការសម្រេចចិត្តផ្នែក នយោបាយក្នុងទម្រង់បំផ្លិចបំផ្លាញ...ទាំងនេះហើយគឺជាមូលហេតុ ជម្រុញឱ្យពួកយើងនាំគ្នាពាក់អាវកាក់ពណ៌លឿង»។
នរណាជាអ្នកនៅពីក្រោយក្រុមបាតុករអាវកាក់ពណ៌លឿង?
ក្រុមបាតុករអាវកាក់ពណ៌លឿង ត្រូវបានបង្កើតឡើង និងផ្ទុះឡើងជាបាតុកម្មតវ៉ាជាលើកដំបូងកាលពីថ្ងៃទី១៧ ខែវិច្ឆិកា ដើម្បីប្រឆាំងគោលនយោបាយរបស់ប្រធានាធិបតីបារាំង លោក ម៉ាក្រុង ជាពិសេសគឺជុំវិញគម្រោងដំឡើងពន្ធលើឥន្ធនៈ (សាំង និងម៉ាស៊ូត)។ ចំណែកឯ អ្នកនាំពាក្យរដ្ឋាភិបាលបារាំង លោក Benjamin Griveaux ធ្លាប់បានអះអាងកាលពីថ្ងៃសុក្រ សប្ដាហ៍មុនថា ក្រុមជ្រុលនិយមនៅក្នុងប្រទេសបារាំងគឺអ្នកនៅពីក្រោយខ្នងបាតុកម្មតវ៉ានេះ ហើយពួកគេចង់ប្រើប្រាស់ក្រុម បាតុករអាវកាក់ពណ៌លឿងដើម្បីផ្ដួលរំលំរដ្ឋាភិបាលបារាំង។
គួរជម្រាបថា នៅក្នុងសប្ដាហ៍នេះ ជាការបន្ធូរបន្ថយភាពតានតឹង រដ្ឋាភិបាលលោកប្រធានាធិបតីបារាំង ម៉ាក្រុង បានយល់ព្រមលុបចោលគម្រោងតំឡើងពន្ធលើឥន្ធនៈ រួមមានទាំងសាំង និងម៉ាស៊ូត ចេញពីកញ្ចប់ថវិកាជាតិឆ្នាំ២០១៩។ ប៉ុន្តែ ក្រុមបាតុករអាវកាក់ពណ៌លឿង ស្រាប់តែចង់បានច្រើនជាងនេះ ដោយពួកគេទាមទារបន្ថែមពីរដ្ឋាភិបាលលោកម៉ាក្រុង ធ្វើយ៉ាងណាឱ្យ ពួកគេទទួលបានប្រាក់ខែខ្ពស់ បង់ពន្ធតិច និងខ្លះស្នើលោក ម៉ាក្រុង ចុះចេញពីតំណែងទៀតផង៕
