(ប៉ារីស)៖ រដ្ឋាភិបាលបារាំងកំពុងត្រៀមរៀបចំ ប្រកាសពីការផ្អាកការតំឡើងពន្ធលើឥន្ធនៈ ដើម្បីឱ្យសាំង និងម៉ាស៊ូតចុះថ្លៃឡើងវិញ ហើយដែលនេះនឹងក្លាយជាការផ្លាស់ប្ដូរគោលនយោបាយជាលើកដំបូងបំផុត របស់ប្រធានាធិបតីលោក ម៉ាក្រុង ចាប់តាំងឡើងកាន់អំណាចកាលពីឆ្នាំ២០១៧ មក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅល្ងាចថ្ងៃអង្គារ ទី០៤ ខែធ្នូ ឆ្នាំ២០១៨។
Reuters ផ្អែកលើប្រភពពីមន្ត្រីរដ្ឋាភិបាលបារាំងបានឱ្យដឹងទៀតថា នាយករដ្ឋមន្ត្រីបារំាង លោក អេឌូអាដ ហ្វីលីព (Edouard Philippe) នឹងប្រកាសពីការផ្អាកការតំឡើងពន្ធលើឥន្ធនៈនៅថ្ងៃអង្គារនេះ (ម៉ោងនៅទីក្រុងប៉ារីស)។ ក្រុមបាតករអាវកាក់ពណ៌លឿង បាននាំគ្នាធ្វើបាតុកម្មតវ៉ាប្រឆាំងនឹងកំណែទម្រង់របស់លោក ម៉ាក្រុង ក្នុងនោះរួមមានការឡើងពន្ធលើឥន្ធនៈ ជាពិសេសគឺ ម៉ាស៊ូតតែម្ដងដែលជាប្រភេទឥន្ធនៈ ពេញនិយមប្រើជាងគេរបស់ប្រជាជនបារាំង។
ដោយឡែកសម្រាប់លោក ម៉ាក្រុង ការតំឡើងពន្ធលើម៉ាស៊ូត គឺជាផ្នែកមួយនៃកិច្ចខិតខំប្រឹងប្រែងទប់ស្កាត់កម្ដៅផែនដី និងការបំពុលបរិយាកាសផែនដី។ ប៉ុន្តែការហក់ឡើងថ្លៃសំាង និងម៉ាស៊ូត បានធ្វើឱ្យប៉ះពាល់ដល់ជីវិភាពប្រចាំថ្ងៃរបស់ ប្រជាជនបារាំងមួយចំនួនធំ រហូតដល់ផ្ទុះជាបាតុកម្មតវ៉ាមកទល់ពេលបច្ចុប្បន្ន។
គួរបញ្ជាក់ថា បាតុកម្មរបស់ក្រុមបាតុករអាវកាក់ពណ៌លឿង ត្រូវបានធ្វើតាំងតែពីពាក់កណ្ដាលខែវិចិ្ឆកា មកម្ល៉េះ ហើយគិត មកទល់នឹងពេលនេះមានមនុស្ស ០៣នាក់ហើយ បានបាត់បង់ជីវិត និងរាប់រយអ្នកត្រូវបានចាប់ខ្លួន និងរងរបួស៕
