(ប៉េកាំង)៖ យន្តហោះដឹកអ្នកដំណើរមួយគ្រឿង​ របស់ក្រុមហ៊ុន​អាកាសចរណ៍ចិនភាគ​ខាង​កើត (China Eastern Airlines) បានធ្វើការចុះចតបែបបន្ទាន់នាថ្ងៃអង្គារនេះ នៅ​ឯ​អាកាសយានដ្ឋាន​ណាឆាង (Nanchang) ក្នុងខេត្ត​ជាំងស៊ី (Jiangxi) ភាគអាគ្នេយ៍​ប្រទេស​ចិន។ នេះបើតាមការដកស្រង់ការផ្សាយចេញពីសារព័ត៌មានរុស្ស៉ី Sputnik នារសៀលថ្ងៃអង្គារ ទី០៤ ខែធ្នូ ឆ្នាំ២០១៨។

ហេតុការណ៍នេះ​បានបង្កឡើង ដោយសារបញ្ហា​បច្ចេកទេសនៅលើ​យន្តហោះ។ ​បើតាម​សេចក្តីថ្លែងការណ៍​​នៃ​​​អាកាស​ចរណ៍ China Eastern Airlines ម៉ាស់ផ្ទុក​អុកស៊ីសែន ​ត្រូវបានទម្លាក់ចុះ​ព្រោងព្រាតក្នុង​​យន្តហោះ នៅអំឡុងការ​ហោះហើរ​ដែលមាន​​គោលដៅ​​ចេញពីទីក្រុង គីងតាវ (Qingdao) ទៅកាន់​ក្រុង ក្វាងចូវ (Guangzhou) ទោះបីជាក្រុម​ការងារយន្តហោះ​ពុំសង្កេត​​​ឃើញ​​មាន​​ការ​ធ្លាក់​ចុះសម្ពាធខ្យល់​នៅក្នុងកាប៊ីនអ្នក​ធ្វើដំណើរ​ក៏ដោយ។

គួរជម្រាបថា ភ្លាមៗនោះ​អាកាសយានិក​យន្តហោះ ក៏បានសម្រេច​​បញ្ឈប់​ការធ្វើដំណើរ ដើម្បីធានាសុវត្ថិភាព​របស់​អ្នកដំណើរ ហើយស្នើសុំធ្វើការ​ចុះចតក្នុងលក្ខណៈ​បន្ទាន់ នៅឯអាកាសយានដ្ឋាន​ខាងលើ នៅក្រុង Nanchang។ ​យន្ត​ហោះ​របស់ China Eastern Airlines បានចុះចត​ដោយជោគជ័យ ខណៈមូលហេតុ​ដែលបង្កឲ្យមាន​បញ្ហានេះ ពុំទាន់​ត្រូវ​បានបញ្ជាក់ឲ្យ​ដឹងនៅ​ឡើយទេ៕