(ញូដេលី)៖ ទីភ្នាក់ងារអវកាសឥណ្ឌា ISRO នាថ្ងៃព្រហស្បតិ៍នេះបានបាញ់បង្ហោះផ្កាយរណបអង្កេតផែនដីស៊េរីថ្មីឈ្មោះថា ហ៊ីសអាយអ៊ែស (HysIS) ព្រមទាំងផ្កាយរណប ៣០គ្រឿងទៀត តាមរយៈគ្រាប់រ៉ុក្កែត PSLV-C43 ឡើងទៅកាន់ទីអវកាស។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មានចិន ស៊ីនហួរ នៅរសៀលថ្ងៃព្រហស្បតិ៍ ទី២៩ ខែវិច្ឆិកា ឆ្នាំ២០១៨។
បើតាមសេចក្តីប្រកាសរបស់ ISRO ផ្កាយរណបទាំង ៣១គ្រឿង ត្រូវបានរ៉ុក្កែត PSLV-C43 នាំយកឡើងទៅកាន់ទីអវកាសពីមជ្ឈមណ្ឌលអវកាស សាទីស ដាវ៉ាន (Satish Dhawan) លើកោះ ស្រ៊ីហារីកូតា (Sriharikota) ភាគខាងត្បូងឥណ្ឌាដោយជោគជ័យ ហើយក្នុងចំណោមនោះ HysIS គឺជាផ្កាយរណបចម្បងគេ។ អង្គការ ISRO បានឲ្យដឹងទៀតថា HysIS នឹងចាប់យករូបភាពផែនដីទាំងមូល ក្នុងទម្រង់ប្រេកង់ជាច្រើន ហើយផ្កាយរណបនេះនឹងមានអាយុកាល បំពេញបេសកកម្មរយៈពេល ០៥ឆ្នាំ។
គួរជម្រាបថា ខាងលើគឺជាការបញ្ជូនផ្កាយរណបលើកទី ២ ហើយនៅក្នុងខែនេះសម្រាប់ទីភ្នាក់ងារអវកាសឥណ្ឌា ដោយកាលពីថ្ងៃទី១៤ ខែវិច្ឆិកា ISRO បានបញ្ជូនផ្កាយរណបទំនាក់ទំនងមួយគ្រឿងឈ្មោះ GSAT-29 តាមរយៈគ្រាប់រ៉ុក្កែត GSLV Mark III ឡើងទៅទីអវកាស៕
