(ហាណូយ)៖ ក្រុមហ៊ុន​អាកាសចរណ៍​វៀតណាម នឹងចាប់ផ្តើមដំណើរការ​ជើងហោះហើរ​អន្តរជាតិ​ចេញពី​ខេត្ត​ ប៊ិញឌិញ (Binh Dinh) ភាគកណ្តាលប្រទេស ឆ្ពោះទៅកាន់​គោលដៅមួយចំនួនក្នុងតំបន់អាស៊ី​ រួមមានដូចជាចិន ជប៉ុន កូរ៉េខាងត្បូង និង​ថៃ នៅឆ្នាំក្រោយ។ នេះបើតាមការដកស្រង់​ការផ្សាយចេញពីទីភ្នាក់ងារ​ព័ត៌មានចិន ស៊ីនហួរ នៅរសៀល​ថ្ងៃចន្ទ ទី២៦ ខែវិច្ឆិកា ឆ្នាំ២០១៨។

ក្នុងនោះរួមមាន​អាកាសចរណ៍ជាតិ​វៀតណាម Vietnam Airlines ក្រុមហ៊ុនអាកាសចរណ៍​ថ្នាក់កម្រិត​ថវិកា Vietjet Air និង​អាកាសចរណ៍ Bamboo ដែលទើប​បង្កើតថ្មី នឹងដំណើរការជើង​ហោះហើរអន្តរជាតិ​​​ចាប់ពីឆ្នាំ២០១៩​ តទៅ​ចេញ​ពី​ព្រលា​ន​យន្តហោះ ភូខេត (Phu Cat) នៃខេត្ត Binh Dinh ដែលក្នុងអំឡុង​ពេល ០៩ខែនៃឆ្នាំ២០១៨នេះ ទទួលបានការ​​វិនិ​យោគ​​​​សរុប​​​ប្រមាណ ៣.៤លានដុល្លារ។

គួរជម្រាបថា យោងតាមរបាយការណ៍​ក្រសួងដឹកជញ្ជូន​វៀតណាម កំណើនទីផ្សារ​វិស័យអាកាសចរណ៍​​​ នៃ​ប្រទេស​អាស៊ាន​​​នេះ​នឹងមានអត្រា ១៦ភាគរយ ចាប់ពេលនេះរហូតដល់ឆ្នាំ២០២០៕