(ប៉ាពូញូហ្គីណេ)៖ នៅចំពោះមុខ​ភាពតានតឹងលើវិស័យ​ពាណិជ្ជកម្ម​រវាង​សហរដ្ឋអាមេរិក និងប្រទេសចិន ​បណ្តាមេដឹកនាំ APEC មិនអាច​មូលមតិគ្នាចេញ​សេចក្តីថ្លែងការណ៍រួម​មួយ តាមទំលាប់​ដូចរាល់ដងឡើយ​នាឆ្នាំនេះ​ នៅ​ពេល​កិច្ច​​ប្រជុំកំពូល​នេះ​ត្រូវបាន​​​បិទ​​បញ្ចប់នៅប៉ាពួញូហ្គីណេ ដោយ​សារ​តែ​ការ​ខ្វែង​គំនិតគ្នា​ជុំវិញ​អនាគតនៃវិស័យពាណិជ្ជកម្ម​ពហុភាគី ខណៈ​វា​​គឺជាលើក​ទី​មួយ​ហើយក្នុង​ប្រវត្តិសាស្រ្ត​នៃកិច្ច​ប្រជុំកំពូល APEC។ នេះបើតាម​ការ​ដកស្រង់ការផ្សាយ​ចេញពីសារព័ត៌មាន​​រុស្ស៉ី Sputnik នៅព្រឹក​ថ្ងៃចន្ទ ទី១៩ ខែវិច្ឆិកា ឆ្នាំ២០១៨។

នាយករដ្ឋមន្រ្តី​ប៉ាពួញូហ្គីណេ លោក ភីធើ អូនែល (Peter O'Neil) បានឲ្យដឹងថា​សមាជិកទាំង ២១ នៃកិច្ចប្រជុំ​កំពូលសេដ្ឋកិច្ចអាស៊ី-ប៉ាស៊ីហ្វិក APEC មិនអាច​​ព្រមព្រៀង​​គ្នា​លើសេចក្តី​ប្រកាសរួមមួយ​ឡើយ។ បើតាម​លោក O'Neil ​ក្រុម​មេដឹកនាំ APEC បានព្យាយាម​ធានា​​ឲ្យ​បាននូវ​​វិស័យពាណិជ្ជកម្ម​ដែលសេរី និងបើកចំហ​នៅ​ឆ្នាំ២០២០ ប៉ុន្តែមិនអាច​សម្រេចការ​ឯកភាពគ្នាបាន​ដោយសារតែ​​មាន «យក្ស​ធំៗទាំងពីរ​នៅក្នុង​បន្ទប់​ប្រជុំ»។

គួរជម្រាបថា ក្នុងអំឡុងកិច្ច​ប្រជុំកំពូល APEC ​សហរដ្ឋអាមេរិកបាន​ចេញមុខប្រឆាំង​​កិច្ចប្រឹង​ប្រែង​​របស់ចិន​ក្នុង​ការ​ប្រើ​ប្រាស់​ទឹកលុយ​ តាមរយៈកិច្ចផ្តួចផ្តើម​ខ្សែក្រវាត់ និងផ្លូវ ដើម្បីពង្រីកឥទ្ធិពល​នៅក្នុង​តំបន់​​ប៉ាស៊ីហ្វិក។ អនុប្រធានាធិបតី​​អាមេរិក លោក ម៉ៃក៍ ភែន (Mike Pence) បានរិះគន់​​ប្រធានាធិបតីចិន​លោក ស៊ី ជិនពីង ​ជុំវិញ​​​គម្រោង​​ខ្សែក្រវាត់ និងផ្លូវនេះ ព្រម​ទាំង​ការ​ទាមទារទឹកដីនៅ​ក្នុងតំបន់សមុទ្រចិនខាងកើត​ និងខាងត្បូង​របស់​ទីក្រុង​ប៉េកាំង ដែលសហរដ្ឋអាមេរិក​មិនអាចទទួល​យកបាន៕​